Barakos gipaluhod sa Niños

CEBU - Nag-ambo na karon sa ganghaan sa kampiyonato ang M. Lhuillier-Cebu Niños dihang ilang gitiwasan ang bisitang Lipa-Batangas Barakos, 83-72 sa Game-2 sa ilang “best-of-five” semifinal series sa nagpadayong aksiyon sa 2008 Smart-Liga Pilipinas National Playoffs kagabii diha sa Cebu Coliseum.

Ang 2-0 nga Cebu Niños ni sports patron Michel Lhuillier ug coach Raul ‘Yayoy’ Alcoseba, naglantaw karon og three-game sweep, apan seguradong makasugat kini og mas hugot pa nga lahugay gumikan kay ang Game-3 molabyog man sa Batangas karong Septiyembre 6. Ang Game-4 kun kinahanglanon duwaon sunod adlaw didto gihapon sa nataran sa Barakos. Kun magtabla ang series, ang Game-5 mobalik dinhi sa Sugbu unya sa Septiyembre 12.

Gihulagway nga hinugtanay sa bakus ang duwa sa duha ka kampo nga misangko ngadto sa 16 ka panagtabla ug pag-ilogay sa labaw. Labing dakung labaw nga narehistro sa maong duwa sa iskor nga 57-50 sa third period pabor sa Cebu Niños kortesiya sa back-to-back triples ni Jayford Rodriguez, apan gitubag kini sa Lipa Barakos pinaagi sa pagbuhi og 13-0 run nga mirehistro sab sa ilang labing daku nga labaw, 63-57 sa oras nga 8:13 sa fourth quarter.

Namintenar sa Lipa Barakos ang singko puntos nga labaw, 72-67 sa nahabiling 3:55 sa duwa, apan naabtan kini sa demalas hinungdan sa ilang kapildihan.

Sa ikaduhang sunod-sunod nga duwa, ang sentrong si Marlon Basco maoy napiling “Player of the Game” pinaagi sa iyang 12 puntos uban ang 16 ka rebounds, duha ka steals ug usa ka blockshot. Apan si Jayford Rodriguez maoy topscorer sa Cebu Niños sa iyang 15 puntos.

Laing duha ka Cebu Niños ang milansang og double figures. Si Stephen mipupo og 11 puntos ug si Bruce Dacia miani og 10 puntos.

Si Jeff Sanders mao sab ang nangulo sa pilderong Lipa Barakos sa iyang 17 puntos, gisundan ni Braulio Lim sa iyang 12 puntos. Sila si Bonbon Custodio ug Al Vergara mi-iskor og 11 puntos matag usa.

PUNTOS MATAG USA

Cebu (83) - Rodriguez 15, Basco 12, Padilla 11, Dacia 10, Ababon 9, Saladaga 6, Tangkay 5, Aying 5, Enriquez 4, Bucao 4, Capati 1, Berame 1

Batangas (72) - Sanders 17, Lim 12, Custodio 11, Vergara 11, Estrada 7, Moody 6, Neo 5, Junio 2, Alfad 1