NLEX ayaw bitawan si Bolick

MANILA, Philippines — Si Robert Bolick ang patuloy na magiging ‘heart and soul’ ng NLEX sa susunod na tatlong taon.

Isang three-year contract ang pinirmahan kahapon ng PBA scoring champion para banderahan ang Road Warriors ni coach Jimmy Alapag.

“Excited for the road ahead,” ani ng 30-anyos na tubong Leyte sa kanyang Instagram post. “Signing this contract is more than just paperwork. It’s a testament of my hard work, determination, grit, and commitment to the team.”

Sa kasalukuyang PBA Season 50 Governors’ Cup ay kumamada si ‘Berto’ ng mga averages na 17.6 points, 5.7 rebounds at league-best 7.5 assists para sa 7-2 record ng NLEX sa Group A kasosyo sa liderato ang San Miguel.

Nagmula ang Road Warriors sa 110-112 kabiguan sa Converge Fiber­Xers (5-4) sa huli nilang laro noong Agosto 14.

Nahugot ng NLEX si Bolick mula sa isang three-team trade sangkot ang NorthPort (Titan Ultra) at San Miguel noong 2023.

Kaagad pinalagda ng Road Warriors ang three-time NCAA champion guard ng San Beda Red Lions sa isang three-year contract para iguhit ang kanilang direksyon sa PBA.

Pansamantalang itinigil ang PBA Season 50 Go­vernors’ Cup para bigyang-daan ang pagsabak ng Gilas Pilipinas sa FIBA World Cup Qualifiers at sa 20th Asian Games sa Aichi-Nagoya, Japan.

Kabilang si Bolick sa Gilas Pilipinas team na magdedepensa ng korona sa Aichi-Nagoya Asiad ka­sama sina Zavier Lucero ng Magnolia at Sedrick Barefield ng Blackwater.