Gray, 4-0 na's BAR 2nd con tournament

Nagpabiling walay pilde ang Gray team ni Allan Lim nga gipaluyohan sa Flora Large Format Printers human gipukan ang Black team, 86-78 sa nagpadayong Basketball Association of Ramos (BAR) 2nd Conference basketball tournament didto sa Cogon Ramos Sports Complex.
Ang Black maoy naka-una ug niabante kini sa iskor nga 45-35 sa halftime pinaagi sa opensa nila ni Mario Cavalida ug Raniel Bernal.
Apan sa kalit lang, misumbalik ang Gray sa second half pinaagi sa pagpatuman og hugot nga depensa nila ni Lim ug Yoyok Alesna aron ilogon ang abante human nila tablaha ang duwa sa iskor 61-all sa fourth quarter.
Sila si Lito Navarro ug Rey Jumamil nagkumboya og 42 puntos alang sa Gray team kinsa naghupot na og 4-0 nga baraha. Si Navarro mipupo og 22 puntos ug si Jumamil miani og 20 puntos, samtang sila si   Lim ug Jun Felicitas miamot og 10 puntos matag usa.
Si Jojo Mante nga adunay 25 puntos maoy nangulo sa pilderong Black team kinsa nagbitbit karon og 3-2 nga baraha.
PUNTOS MATAG USA

Gray (86) -- Navarro 22, Jumamil 20, Lim 10, Felicitas 10, Alesna 8, Cobacha 6, Pilapil 5, Apa 3, Salaritan 2

Black (78) -- Mante 25, Cavalida 16, Bernal 12, Suico 8, Lugod 7, Rubi 5, Abella 3, dela Victoria 2