Friday Club mipaluhod sa LWCM

Ang Friday Club nga gi-agak sa Castle Peak Hotel mipaluhod sa Living Word Christian Ministry (LWCM) ACES, 64-51 atol sa ilang panagtagbo niadtong miaging adlaw sa  Barkadahan Hoops didto sa City Sports Club-Cebu sa Cebu Business Park.

Ang hugot nga depensa sa Friday Club nakapakurat og maayo sa ACES nga igo lang nakahimo’g upat ka puntos sa tibuok second period aron pagposte og 34-15 nga labaw sa halftime.

Si Jimbo Noel mipabuto og 22 puntos aron pangulohan ang Friday Club, samtang si Benedict Chua mitampo og 16 puntos ug ang uban nilang kauban miamot og ginagmay  sa opensa lakip na ni Abe Sy ug team manager Charlie Tolentino.
Ang maong kadaugan naghatag sa Friday Club og 2-2 win-loss record.

Lakip sa unom ka teams nga misalmot sa maong liga mao ang Rama Boys ubos sa pagpangulo ni Cebu City Vice Mayor Michael Rama.

Ang Rama Boys mikulit sa  labing una nilang daog pinaagi sa pagpukan sa Sunday Club, 60-55 alang sa ilang 1-4 nga baraha.

Sa laing duwa, ang Mandaue Jaycees midaog sab batok sa Monday Club, 57-50 aron pagtabla sa ilang biktima nga nagbitbit og managsamang 3-1 win-loss records.
PUNTOS MATAG USA

Friday Club (64) --  Noel 22, Chua 16, Sy 9, Cruz 7, Ong 4, Lin 2, Tolentino 2, Yu 2, Tanting 2
ACES (51) -- Sacabon 24, Catamco 11, Solis 4, Pelino 3, Geniz 2, Pastor 2, Tan 2, Rosales 2