Go mu-away karon, andam na!

Dako’g salig ang mga RP coach sa duha ka taekwondo player nga magmalampuson kini sa ilang tahas nga mudaog sa tagsa-tagsa nila ka kategoriya sa ipahigayong Beijing Olympics taekwondo competition nga sugdan karong buntag didto sa Beijing University of Science and Technology, China.

Unang makigbugno karong alas 10 sa buntag si Tshomlee Go batok sa pambato sa Australia nga si Ryan Carneli sa unang round sa flyweight 67 kg division.

Kung mudaog si Go batok ni Carneli sa unang round, mao kini ang muhatod niya ngadto sa quarterfinals nga ipahigayon duha ka oras human sa kompetisyon.

Ang kalampusan niya sa quarterfinals, semi-finals ug final round maoy mamahimong yawe aron iyang makuha ang gold medal nga dugay na nga gidamgo sa mga Pilipino.

Samtang sila si coach Kim Hong Sik ug Rocky Samson mipadayag nga dako ang ilang pagsalig sa atleta sa Pilipinas nga mulampos sa ilang tinguha nga mulangkat og medalya sa natad sa taekwondo.

Dako usab ang kalipay sa duha ka coach dihang ilang nasayran nga ang mga lig-on nga atleta tua mahimutang sa laing bracket ug ang makontra nilang Rivero ug Go sa unang round mao ang atleta nga wala pa makakulit og pangalan sa taekwondo.

Nasayran nga ang unang round usa ka kritikal nga duwa ug angay lang nga dili mamahimong over-confident ang duha tungod kay mao unya ni ang maghatod nila sa kapildihan dungan ang pagkapapas sa ilang paglaum nga makakuha og gold medal.

Makigsangka usab ang laing taekwondo player nga si Mary Antoinette Rivero karong Biyernes batok ni Croatian Sandra Saric sa unang round.

Kung mulampos siya pagpukan ni Saric sa unang round, mutabok kini sa quarterfinals ug posibling iyang makontra ang Korean two-time world champion nga si Hwang Kyung-seon.

“We have to be careful because these (16) players (sa women ug mens division) have prepared for this event. If you win in the first round you have a 50 percent chance of winning a medal. If their performance is up to the level, we have a good fight. If they win in the first round, they will be more composed to fight in the next rounds all the way to final,” matud pa ni Samson kinsa makauban ni Rivero karong Biyernes.

Ang taekwondo sa Beijing Olympics nagsunod sa bag-ong format. Ang atleta nga makahipos og upat ka daug maoy mudagit sa gold medal samtang ang mapildi sa final round maoy makadawat sa silver medal.

Samtang ang duha ka pildero sa semifinal round makig-away sa first round winner ug ang mudaog niini maoy makakuha sa bronze medal.