Pinay milangkat og  bulawan sa Malaysia

Laing Pinay na usab ang milangkat og bulawang medalya sa gipahigayong Asia-Pacific Indoor Bowls Championship sa women’s single category didto sa Kuala Lumpur, Malaysia niadtong milabay’ng adlaw.

Si Rosita Brandborn maisugong mipukan ni Nor Hashimah Ismail sa iskor 7-9, 16-6, 3-1 atol sa final round ug midagit sa bandera.

Atol sa gipahigayong semifinal round, gipatiran ni Bradborn ang laing taga Malaysia nga si Siti Zalina Ahmad sa iskor 5-7, 8-7, 5-0 hinungdan nga miabante kini siya sa finals ug iyang nakontra si Ismail.

Ang kadaugan ni Bradborn nagsilbi usab nga panimalos ngadto kang Siti kinsa mipildi usab niya niadtong miaging tuig sa gipahigayong sixth Asian lawn Bowls Championship didto gihapon sa Malaysia.

Si Bradborn milangkat usab og silver medal sa milabay’ng Southeast Asian games sa womens single nga midugang sa medalya sa Pilipinas.

Dili lang si Bradborn ang unang Pilipino nga misikat sa natad sa Bowling, kahinumduman nga niadtong dekada 70 misulbong usab ang Pinoy nga si Rafael “Paeng” Nepomuceno.

Si Paeng nailhan usab isip pinakamaayong bowler sa tibuok kalibutan. Niadtong 1976, nahimo kining kampiyon didto sa Tehran, Iran samtang niadtong 1980 gilangkat usab niini ang gold medal didto sa Jakarta, Indonesia.

Sa sayong bahin usab sa dekada 90, midaug usab kini didto sa Le Mans, France ug midagit usab kini og gold medal niadtong 1996 didto sa Belfast, Northern Ireland.