RP record sa basketbol

Papason sa China Hapit na mapapas ang record sa Pilipinas isip nasud sa Asia nga pinakataas og naabot sa natad sa basketball sa Olympic. Ang maong record suwayan pagpapha sa China sa nagpadayong 2008 Beijing Olympics. Ang Pilipinas nagkupot og record nga pito ka appearance sulod sa 16 ka Olympic basketball competition, ang China, South Korea ug Japan nga nakasalmut sa ika-unom ka higayun , gisundan sa Chinese-Taipei nga adunay tulo ka Olympic appearance samtang ang Thailand, Iran, Iraq, India ug Singapore nga igo palang nakasalmot sa maka-usa ka higayon gikan pa niadtong tuig 1936.

Wala pay bisan usa ka nasud diri sa Asia nga nakabuak sa maong record nga gipatik sa mga Pinoy, apan ang China naglaraw nga mapulihan ang Pilipinas sa maong record, Tinguha karon sa China nga labwan ang record sa Pilipinas nga mitapos og 5th-place niadtong 1936 Olympics didto sa Berlin. Niadtong tungura ang Pilipinas mitapos sa maong competition sa 4-1 nga baraha , una nilang gipukan ang Mexico, 32-30 , gisunod nila ang Estonia, 27-19 apan napilde sila sa USA, 56-23, human sa maong kapildehan ang Pilipinas namawi pinaagi sa paglatos sa Italy ,32-14 ug katapusan dihang ilang gilampornas ang Uruguay 33-23.Ang pinakataas nga natapos sa China ug South Korea sa miagi nilang mga Olympic mao ang 8th place.

Nagkanayun ang kanhi presidente sa Philippine Olympic Committee nga si Col. Julian Malonso nagsugod ang paghagba sa basketball team sa Philippines niadtong 1975 dihang nahimugso ang PBA , kahinumduman nga niadtong tuiga gidid-an pa ang mga professional player nga musalmot sa Olympic. Apan bisan paman karon nga pwede moduwa ang mga professional player, maglisud gihapon ang Pilipinas sa pagsalmut sa mga umaabot nga Olympic tungod sa pagsubang sa mga lig-on nga koponan sa Asia sama sa China, South Korea ug Japan .”Personally ,I dont think we’ll ever qualify again because our opponents are taller and stronger,” matud pa ni Malonso. Ang bugtong hinagiban nato arun mabalik kita sa Olympic mao ang paggamit nato sa atong kapaspas ug ang pagpasulod nato sa atong mga three-point shots sama sa gibuhat nila ni Alan Caidic ug Simon Lao sa ilang kapanahonan.”We’ve got to hit three with as much consistency as scoring a lay-up,” dugang ni Malonso.

Niadtong 1948 ang Pilipinas mipukan sa Argentina ,45-43, sukwahi karon nga ang Argentina usa na sa mga gikahadlokan nga koponan sa tibuok kalibutan dihang ilang gilangkat ang gold medal sa 2006 Athens Olympic. Lakip usab sa gilupig sa Pilipinas mao ang Spain sa iskor nga 84-82 niadtong tuig 1960. Gipalukapa usab sa Pilipinas ang Canada , 81-65 niadtong tuig 1952 , ug gisunod ang France , 65-58 niadtong tuig 1956. Ang mga nahisgutang nasud imposible na nga mapukan sa Pilipinas karon.

Ang labing ulahing koponan sa Pilipinas nga nakasalmot sa Olympic niadtong 1972 gilangkuban nila ni Bogs Adornado, Narciso Bernardo, Joy Cleofas, Danny Florencio, Jimmy Mariano, Yoyong Martinez, Roger Melencio, Ed Ocampo, Manny Paner, Jun Papa, Marte Samson ug Freddie Webb.