Spain mipukan sa Germany, sunod muharong sa

Miduslit og 13 puntos ang forward sa Los Angeles Lakers nga si Pau Gasol arun abagan ang koponan sa Spain sa ilang kadaugan batok sa Germany sa iskor nga 72-59 sa nagpadayong aksiyon sa basketball event sa 2008 Olympics didto sa Basketball Arena, Beijing, China.

Laing mipuntos alang sa Spain mao ang point-guard sa Toronto Raptors nga si Jose Manuel Calderon kinsa mao ang nangulo sa mga Kastila pinaagi sa iyang 15 puntos samtang si Alex Mumbru miamot og 14 puntos , lakip na niini ang pagpatusak niya sa iyang tulo ka three-point shots. Sa ilang bahin, ang pilderong Germany nga gipangulohan sa NBA star ug sinaligang forward sa Dallas Mavericks nga si Dirk Nowitzki kinsa nakatagamtam sa hugot nga depensa sa mga Kastila igo lang nakatigom og 11 puntos.

Tungod sa maong kadaugan ang Spain karon mao na ang nag-una sa standing sa Group-B sa basketball event pinaagi sa ilang 3-0 nga baraha , samtang ang nagsunod kanila mao ang Team USA nga adunay 2-0 nga baraha , ang Spain ug ang USA mag-abot karong Sabado alang sa solong liderato sa Group-B. Samtang ang Germany nga nagbaton na karon og 1-2 nga baraha sunod ika-sangka ang China Team sa susamang adlaw.

Sa laing bahin , ang koponan sa Spain kinsa nakadawat karon og mga pagsaway didto sa Beijing Olympics human nila giingon nga gibugalbugalan ang mga Tsino sa nigawas nga hulagway diin ilang gituyo pag-pikot ilang mga mata susama sa usa ka Tsino, nidepensa nga dili nila tuyo ang mupasakit o kaha magbugal-bugal sa mga taga-China.Kahinumduman nga mikatap ang maong hulagway human gipukan sa Spain ang China sa overtime, 85-75.