UV ug SWU mag-ilog sa 2nd place
Ang beterano nga si Luther Luke Justiniani maoy mitimon sa opensa sa University of San Jose Recoletos (USJR) Jaguars sa second half aron pagpukan sa University of San Carlos (USC) Warriors aron pag-iskor og 77-64 nga kadaugan alang sa ilang 4-0 nga baraha sa nagpadayon nga Cebu Schools Athletic Foundation, Inc. (CESAFI) basketball tournament kaniadtong Martes sa gabii didto sa Cebu Coliseum.Gipahugtan na pag-ayo sa Jaguars ang ilang liderato sa 4-0 nga baraha ug karon, mag-ilog sa ikaduhang pwesto ang seven-time champion University of the Visayas (UV) Green Lancers kinsa makigharong na usab sa ilang higpit nga karibal nga Southwestern University (SWU) Cobras.
Dili pa lang dugay nga bag-o lang nagtabla sa ilang dumot ang duha ka basketball titans. Ang Lancers mikuso-kuso sa Cobras sa 6th Asian University Basketball Championships (AUBC) samtang ang Cobras mipukan sab sa Lancers aron pagsakmit sa korona sa National Students Basketball Championships (NSBC) kaniadtong Marso diha gihapon sa Cebu Coliseum.
Si Justiniani kinsa maoy napiling CESAFI Player of the Week, maoy nangu sa opensa sa Jaguars gamit ang iyang taas nga kasinatian sa duwa aron paghakot og 17 puntos lakip na ang duha ka three-point plays sa kataposang duha ka minutos.
Nakabsan gyud sa paglaum ang Warriors sa pagsugod sa fourth period human lang sila makasikit sa kataposang higayon sa iskor, 50-53 pinaagi sa basket ni Giovanni Padillo may
Napawong ang kainit sa Warriors dihang si Kurt Amores usa ka premyadong rookie nga taga Zamboanga del Norte, mi-iskor alang sa 55-50 nga labaw ug si Justiniani midugang alang sa 57-50 nga labaw og wala na hatagi sa Jaguars og higayon nga makasikit og usab ang Warriors nga wala na sab makasustenir didto sa unahan.
Sa kalit lang, milabaw og 14 puntos ang Jaguars, 66-52 ug diha na mahugno ang paningkamot sa Warriors ug miabot pa gani ang labaw sa 18 points, 76-58 duha na lang ka minutos ang nahibiling oras.
Nalangay sa makadiyot ang duwa kay bisan og segurado nang modaug ang Jaguars, mitawag pa man gihapon og timeout si Jaguars coach Edito Salacut ug agi’g bawos, gigamit sab sa Warriors ang kataposang duha nila ka timeouts isip protesta sa maong pagbugal-bugal o insulto.
Ang maong kapildehan naghatod sa Warriors ngadto sa 2-2 nga baraha ug pagasaw-an sila sa ikatulong pwesto sa mapilde tali sa Lancers ug sa Cobras.
Si Paul Joven maoy nangu sa Warriors sa iyang 18 puntos ug si Enrico Llanto may 15 puntos.
Puntos kada
USJR (Srs.) 77— Justiniani 17, Ponce 12, Malinao 10, Gabas 8, Gudez 7, Delfino 6, Pogoy 6, Bibera 5, Amores 4
USC (Srs.) 64—Joven 18, Llanto 15, Cortes 9, Cantonao 5, Bakker 4, Igao 4, Bautista 4, Rowe 3, Hermosa 2
Halftime: 37-28.
- Latest
- Trending
