Bobby Pacquiao mi-K.O sa kontra, Thailander gi-oxygen

Usa ka makusug nga left straight ang gipatugpa ni Bobby ‘The Sniper’ Pacquiao(29-14-3,14 KOs) sa suwang sa Thailander nga si Decho Bankluaygym(28-11-2,19 KOs) nga maoy hinungdan sa pagkalup-og niini sa eight round aron masakmit ang World Boxing Organization(WBO) Asia-Pacific lightweight title sa main event sa “Road to Redemption” niadtong miaging gabii didto sa Pacific grand ballroom Waterfront Cebu City Hotel and Casino.

Ang manghod ni Manny ‘Pacman’ Pacquiao milampos sa iyang tahas nga mudaug diri sa Sugbo. Apan dili sayun ang giagian ni Pacquiao una niya mapatumba si Bankluaygym,sa sayung bahin sa away mipakita og ka agresibo ang Thailander ngadto kang Pacquiao nga maoy nakapaaghat sa trainer ni Pacquiao nga si Buboy Fernandez nga muhimo og adjustment . Sa pag-abot sa sixth round gipatumba ni Pacquiao ang Thailander apan nakabangun pa kini, sa eight round gibuhian ni Pacquiao og usa ka makabungog nga left straight nga maayong pagka-igo sa suwang ni Bankluaygym hinungdan sa pagkatumba niini ibabaw sa ring.

Tungod sa iyang nahiaguman, gitabang si Bankluaygym sa mga paramedic nga midali og taud og oxygen ngadto sa naglisud og ginhawa nga boksidor. Human sa maong kadaugan , si Pacquiao mupadayon sa iyang training aron mangandam sa usa ka dakung away nga muabot kaniya karong Septiyembre o Oktubre ning tuiga.

Sa laing bahin, ang Oriental Pacific Boxing Federation champion (OPBF) nga si Rolly ‘Matsushita’ Lunas midepensa sa iyang titulo batok kang Kaonah Khlongphajon sa Thailand pinaagi sa unanimous decision.Samtang ang long-time sparring partner ni Manny Pacquiao nga si David Rodela nga taga Guadalajara ,Mexico mi-TKO ngadto kang Arnel Porras.Laing midaug sa undercard sa maong event mao si Marvin Tampus nga midaug batok kang Eric Barcelona pinaagi sa disqualification tungod sa pagpunay niini og low-blow , midaug usab ang gitawag nga ‘the Fighting Doc’ nga si JV Tuazon ngadto  kang Jarol Rosales sa usa ka 4-round match. Samtang ang lumad nga taga Kibawe, Bukidnon nga si Mark Anthony Geraldo mi-TKO sa first round sa usa sa mga boksidor ni Fernandez nga si Esrael Salud.