RMB, Hannah magtinaktakay

Mag-abot karon sa katapusang higayon ang RMB  ug Hannah sa ilang  tinaktakay nga semifinals sa nagpadayong aksiyon sa Asturias Inter-barangay Reinforced Basketball Tournament karong adlawa diha sa Asturias Sports Complex sa  Asturias,  Cebu.

Ang duwa sugdan sa alas-9:30 sa gabii human sa   engkuwentro sa Looc Norte ug Poblacion All Stars sa ilang non-bearing game sa alas-7:30 sa gabii.

Ang modaog sa RMB-Hannah showdown maoy makaangkon og katungod sa pakigharong sa nagpaabot nga Looc Norte sa finals ugma didto gihapon sa Asturias Sports Complex, samtang ang mapilde maoy moharong sa Poblacion All Stars alang sa ikatulong dapit.

Sa laing bahin, ang Asturias Vendor's Association (AVA) nga gipangulohan sa ilang presidente Joy Edison Dacua mopasiugda og live disco concert nga pagaulohan og "Let's Groove Disco Concert"  karong Agosto 10  sa alas-9:00 sa gabii  sa Asturias Sports Complex.

Usa sa motukar mao ang Southside Band, ang kampiyon sa GSM Blue Band Competition.

Ang maong kalihukan tipik sa pagsaulog sa umaabot nga kapistahan ni Senior San Roque, ang mahal nga patron sa maong lungsod karong Agosto 16.