3 ka opisyal sa world boxing moabot karon

Tulo ka mga opisyales sa world boxing ang gikatakdang moabot karong adlawa dinhi sa Sugbu aron moduyog sa mga Pinoy  sa eksplosibong World Boxing Association (WBA) super flyweight championship tali ni AJ ‘Bazooka’ Banal ug Panamian Rafael ‘Little Bull’ Concepcion nga maoy main event sa gikahinamang “Laban Na Banal, Panahon Na” card karong Sabado nga sugdan sa alas-7:00 sa gabii diha sa Cebu Coliseum.

Si Eric Gomez, ang vice president sa Golden Boy Promotions  (GBP)  ni  Oscar de la Hoya gipaabot nga moabot karong alas-9:00 sa buntag.

Ang Golden Boy Promotions nakigsangga sa  ALA Promotions   aron  mapahigayon ang  mga world-class boxing events dinhi sa nasud.

Ang mga bigtime boxing nga napahigayon niining nabantog nga promoters naglakip sa Invasion (Bautista vs. Camargo) niadtong Abril 6 ug ang Moment of Truth (Gorres vs. Montiel) niadtong Pebrero 24, 2007.

Si World Boxing Organization (WBO) Asia Pacific chairman Leon Panoncillo moabot sab karon sakay gihapon sa maong flight ug temporaryo kining mopuyo uban sa laing langyaw’ng mga bisita  diha sa Waterfront  Cebu City Hotel and Casino sa Lahug, ning siyudad.

Sa laing bahin, si ALA Promotions vice president Dennis Cañete miingon nga ang kanhi World Boxing Council (WBC) featherweight champion Luisito ‘Golden Boy’ Espinosa  nagpareserba na alang sa makasaysayanon nga kalihukan.

Nahuptan ni Espinosa ang bakus bali'g  upat ka tuig human niya gipilde si Manuel Medina pinaagi sa unanimous decision didto sa Tokyo, Japan.

Iyang napanalipdan ang bakus sa makaunom ka higayon hangtod nga si Kennedy McKinney mipukan kaniya niadtong 1998 pinaagi sa second round stoppage.

Ang “Laban Na Banal” card gipadagan sa ALA Promotions uban sa ABS-CBN Sports, Golden Boy Promotions ug sa Cebu City Government.

Ang mga tiket nagkantidad og P150 sa general admission, P300 sa upper box, P500 sa lower box, P750 sa ringside, P1,500 alang sa  lower box/VIP ug VIP 4th row, P2,000 sa VIP 3rd row, P2,250 sa VIP 2nd row ug P2,500 sa VIP 1st row.

Ang mga tiket mapalit sa Islands Souvenirs, Bisaya ug USA Sports boutiques sa SM City-Cebu ug Ayala Center-Cebu, ALA Gym sa Banilad Town Center, Pandelicious sa Punta Princesa, Marfori Bakeshop-Mandaue ug Tita Gwapa Tabunok ug Mandaue branches.