San Pedro milangkat sa korona

Gipakita sa San Pedro ang ilang kabalaan dihang ilang gipaampo ang Purok 3 sa iskor nga 83-70 sa championship match sa 3rd SK and Barangay Council Cup 2008 didto sa Tisa Sports Complex, barangay Tisa ning siyudad.

Mitakingking ang San Pedro sa unang kuwarter dihang gikontrolar kini sa Purok 3, kinsa miabante og tres puntos   paghuman sa maong kuwarter. 21-18.

Ang San Pedro mipatuman og hugot nga depensa inubanan sa ilang nagtusaktusak nga opensiba aron pag-ilog sa momentum  nga giugom sa Purok 3  ug mao na ang nakabentaha og kuwatro puntos paghuman sa first half sa iskor nga 41-37.

Sikit kaayo ang maong duwa diin pito kini ka higayon nga nagtabla.

Ang San Pedro padayon nga mipatuasik sa ilang mga puntos hinungdan nga miinat ang ilang labaw ngadto na sa nuybe puntos sa third quarter. Nag-aso-aso ang kainit sa San Pedro sa katapusang kuwarter ug wala na kapugngi ang ilang pagratsada hangtod nga napupos ang oras sa ilang duwa.

Gawas sa tropeyo, ang    San Pedro mibulsa og P5,000, samtang ang Purok 3 gitunolan og P3,000.

Si Toto de los Reyes maoy miangkon sa MVP trophy ug gipatabanan pa kini og P500 nga salapi.

Ang 3rd SK and Barangay Council Cup 2008 gipasiugdahan ni Konsehal Edu Cabulao Jr., ang chairman sa Committee on Sports uban sa abag sa Tisa Barangay Council ubos sa liderato ni Brgy. Capt. Eddie G. Cabulao ug  J.R Pepito, ang SK Chairman.

Sila si Richard Recasas, Mark Gil Ypilan, Rosell Cañamo, Joseph Largosa, Louis Alcala, Junior Oficier ug Felauro Mabala maoy mga sports committee nga adunay dakung papel sa kalampusan sa maong kalihukan.

Puntos Matag Usa

SAN PEDRO (83)  -- Ceballos 21, delos Reyes 19,  Caburnay 12,  Eyao 10,   Moreto 8,  Labor 5,  Acosta 4,  Moreta 2, Caburnay 2

PUROK 3 (70) -- Ople 16,  Benedicto 13,  Caburnay 13, Dexter 11,  Marabiles 7,  Codiñera 5,  Pacaña 3,  Codiñera 2.

Quarterscores

18-21, 41-37, 57-48, 83-70