Berdun gipakgang

Nababagan ni Celin Villarosa ang pagdaog ni Loloy Berdun sa tulo ka sunod-sunod nga legs pinaagi pagdominar sa third leg sa June's Criterium Rider of the Month didto sa Mandaue Reclamation area.

Si Berdun wala mabuylo ug  naglisod kini paglusot  kay gisikitan man kini og maayo ni Villarosa ug sa ubang mga riders.

Si Rudy Mendoza mitapos sa ikaduha, samtang ang mipahiluna sa ikatulo ug ikaupat nga dapit sa "By Invitation (BI) action mao sila si Nanie Quijano ug Lito Quebec.  Si Berdun mikapyot sa ikalima.

Gisugdan ni Berdun ang aksiyon ning bulana pinaagi sa mapahayloon nga kadaugan. Gisundan niini atol sa second leg nga gipahigayon usa ka adlaw human sa unang lumba.

Ang second leg usa ka climb stage ug dili criterium, apan maihap gihapon kini sa overall rankings.

Ang climb stage, si Berdun maoy mikatkat sa kinatas-ang dapit, gisundan ni Mendoza, samtang mitungtong sa ikatulo hangtod sa ikalima nga dapit mao sila si William Pagula, John Ermitanio ug Pedro Naval.