Dili angay makontento

Ang usa ka  bilyarista dili angay mahimong complacent mahitungod sa iyang performance sa dula. Sa laktod, dili siya angay magsalig nga maayo ang iyang performance. Dili siya angay magkompiyansa nga naglabaw siya'g score sa iyang kaatbang kay basin mabiktima siya sa baligho sa higayon ug siya hinuon ang mapilde.

Sa pagdula gud og bilyar, ang paglabaw og score dili hingpit nga garantiya nga modaog sa dula samtang dili pa matapos sa hingpit ang maong dula. Posible man gud nga mobalit-ad ang sitwasyon ug makakuha'g pabor ang kaatbang nga nabiyaan sa score. Kun mahitabo ang ingon niini, hayan maapsan sa kaatbang ang iyang score.

Adunay magdudula nga kontento na kaayo kun maigo niya ang bola (object ball) segun sa gitinguha niya sa iyang tayada. Niini, mobati na siya'g dakung kompiyansa sa iyang kaugalingon ug maghunahuna nga igo na ang mao niyang performance aron mabuntog niya ang iyang kontra. Apan matud pa sa usa ka eksperto sa billiard sport, dakung sayop kining maong mentalidad. Angay kining korehian samtang sayo pa.

Sa iyang libro nga Snooker and Billiards, si Ashok Kumar miingon: "It is vital that you do not content yourself merely with hitting the object ball. You must hit it in such manner as not to leave your opponent a scoring opportunity.  If you miss it, you must do so in a way that does no more damage than the penalty forfeit."

Undanon kaayo kining maong pamahayag ni Kumar. Buot niyang ipasabot nga kinahanglang dili molugak ang performance sa magdudula sukad sa pagsugod sa dula hangtod sa pagkahuman niini. Dili gyud mokompiyansa. Dili angay makontento sa iyang paglampos sa pagpasulod sa bola ngadto sa pocket. Angay niyang paninguhaon nga sa matag tayada nga iyang himuon, dili siya magbilin og bisan gamay nga kahigayonan sa iyang kaatbang nga makahuygo sa pagkontrolar sa lamesa.

Kutob sa mahimo, kinahanglan nga siya'y magkontrolar sa billiard table sa natad sa scoring. Sa higayon nga makabunlot ang iyang kaatbang og turno sa pagtira, mameligro ang iyang preparasyon. Busa kutob sa mahimo, ipakita ang hugtanay sa bakus nga pakigsangka. Dili angay makontento sa matag malampuson nga tayada. Kinahanglang  i-improve kini sa matag higayon.

* * *

(Mga sugyot ug pakisayod? Text sa 0910-8105522)