Gorres, Tuñacao mobanat na

Pas-anon na nilang IBF Intercontinental super flyweight champion Z 'The Dream' Gorres ug kanhi WBC flyweight champion Malcolm 'Eagle Eye' Tuñacao ang ilang bug-at nga tahas sa  ilang pinaksitay sa mga Aprikano nilang mga kaatbang sa "One More Time" card nga sugdan karong alas-6:00 sa gabii didto sa Pacific Grand Ballroom sa  Waterfront-Cebu City Hotel and Casino sa Brgy. Lahug, ning dakbayan.

Si Gorres (27-2-2, 15KOs) makigbinukbukay ni UBO bantamweight champion Nick Otieno (15-1, 5KOs) sa Kenya, samtang si Tuñacao (21-2-3, 14KOs) makighamag batok ni Tanzanian Professional Boxing Commission titlist Rashid Ally (11-9-7, 2KOs) sa ilang 10 ka hugna nga engkuwentro.

Bisan og non-title ang maong mga away, apan mahinungdanon gihapon kaayo kini alang nilang Gorres ug Tuñacao.

Si Gorres kinahanglan nga moladlad og makalisang nga abilidad aron subli siyang maka-away og world title batok sa modaog sa IBF super flyweight championship tali nilang defending champion Dimitri Kirilov sa Russia ug Vic Darchinyan sa Australia sa dili pa matapos ang tuig.

Sa iyang bahin, si Tuñacao, gikinahanglan nga mohimo og impresyon ug pamatud-an nga aduna pa siya'y  ikabuga aron mahimo na sab nga world champion.

Si Tuñacao wala na  maka-away sud sa 16 na ka bulan, apan mipadayag siya nga mibalik na ang iyang kondisyon ug andam na siyang makigbugno ni Ally.

Gawas nilang Gorres ug Tuñacao, angayan sab nga lantawon sa mga mahiligon og boksing si Jason Pagara (13-1, 7KOs) nga mopakita sa iyang abilidad sa labing unang higayon ubos sa ALA Boxing Gym batok ni Indonesian Heri Andriyanto (11-3, 7KOs) alang sa WBO Youth lightweight title.

Sa edad nga 16 anyos, si Pagara nagpanikad nga mokulit sa iyang pangan sa kasaysayan isip labing bata nga WBO regional champion.

Gipaabot nga molingaw sab sa mga manan-aw mao ang special bout tali ni Elorde Gym rising star Juan Miguel Elorde ug Racem Laud sa Bacolod City.

Lain pang mag-engkuwentro mao sila si Jether Oliva (8-0, 7KOs) sa General Santos City  batok ni Jayson Rotoni (4-1-1, 3KOs) sa Elorde Gym, Jun Intor (9-3-4, 5KOs) sa Negros Occidental  batok ni Ali Belonguel sa Mandaue City (6-1), Romeo Jakosalem (6-3, 3KOs) sa Davao City batok ni Elmer Colve (5-3-1, 3KOs) sa Cagayan de Oro City ug Ratazu Matsui sa Tokyo, Japan batok ni Jerson Mancio (3-0-1, 2KOs) sa Esperanza, Agusan del Sur.