Melligen, Masicampo mo-away sa Australia

Si kanhi Southeast Asian Games gold medalist ug reigning RP light welterweight champion Mark Jason Melligen gikatakdang moharong ni kanhi WBC Youth interim light welterweight contender Payakchai Sithparadorn ugma adto sa Knok Netball Centre sa Victoria,  Australia.

Si Melligen kinsa nagbitbit og 10-1 adunay 70 percent win record pinaagi sa knockout sa pro career sud lang sa duha ka tuig.

Midaog si Melligen sa una niyang away isip pro pinaagi sa pagpa-undang sa bag-o lang sab nga mitikang pagka- pro nga si Rolando Malonhao sud lang sa first  round didto sa  Tagbilaran City.

Bugtong nakapilde ni Melligen mao si Yong-Sung Kim sa iyang kampanya pagpalagpot ni reigning interim WBO Asia Pacific light welterweight titlist niadtong Pebrero sa miaging tuig.

Apan si Melligen daling nakabawi ug iyang giangkon ang bakanteng Philippine light welterweight crown batok ni Christopher Saluday duha ka  buwan human sa iyang kapildihan.

Sa iyang bahin, si Sithparadorn, kinsa nag-una lang og duha ka buwan ni Melligen sa pagpakita sa iyang unang away isip pro niadtong 2006 nangampanya sa tunga-tungang probinsiya sa Thailand lakip na ang amihanang probinsiya sa Maehongson.

Niadtong miaging tuig, si Sithparadorn mitaak didto sa Portugal aron makigbinukbukay ni Ali Chebah alang sa WBC youth interim light welterweight title.

Gawas ni Melligen, laing Pinoy’ng boksidor nga si Glen Masicampo mopakita sab sa iyang abilidad batok sa Nigerian nga si Oyewale Omotos, kinsa wala pa mapilde sa upat ka away.