Eksplosibong away sa Balamban

Mga molupyo sa Balamban makasaksi na sab og eksplosibong kumbati  ibabaw  sa ring diin magsangka sa main event mao si RP No. 7 bantamweight contender Jomanz Omanz sa ALA Gym ug si RP No. 2 contender Jonathan Ba-at sa Rex 'Wakee' Salud Stable karong Abril 30 sa Balamban Sports Complex.

Si Omanz way pilde sa 11 ka away diin unom sa iyang mga biktima iyang gipalukapa. Gawas sa Mandaue nga maoy iyang balwarte, si Omanz nakaaway na sab sa  Tagbilaran City ug ingon man sa Quezon City.

Bisan pa sa impresibo niyang rekord, dili angayan nga mokompiyansa si Omanz gumikan kay si Ba-at taas na sab og naagian ug nakaaway na kini sa Thailand ug Indonesia gawas nga nakaladlad na sab kini sa iyang abilidad sa nagkadaiyang dapit sa nasud sama sa Palawan, Digos, Davao del Sur ug Zamboanga del Norte.

Midaog si Ba-at sa nag-una niyang tulo ka away sa pro. Mao kini ang iyang taytayan aron hagiton si PABA super bantamweight champion Poonsawat Kratingdaenggym sa Bangkok, Thailand. Apan walay suwerte si Ba-at kay mikamang kini atol sa iyang pagsulong.

Mobanat sa kulbahinam nga undercards mao sila si Roli Gasca sa ALA Gym batok ni Nelson Llanus sa Bernard Yu Stable, James Bacon sa ALA Gym batok Sammy Surdilla sa Tony Dacer Stable, Rey Villar sa Sultan Kudarat batok Jumar Cabusas sa Butuan City ug Mark Jesson Taroja batok  Lowell Saguisa sa Leyte.

Gipasiugdahan sa ALA Promotions, ang maong boxing card gipahigayon aron pagdugang og kasadya sa kasaulogan sa adlaw'ng natawhan ni Balamban Mayor Alex Binghay, kinsa hilig sab nga mopaluyo sa boksing.