Atan Guardo-Sherilin naka-ikyas
Naka-ikyas ang Atan Guardo-Sherilin Plastics ug MJV Builders sa kulbahinam kaayo nilang duwa aron pag-ugbok og daog batok sa ilang tagsa-tagsa nga kaatbang sa nagkainit nga aksiyon sa 2008 K Gallery First Conference Basketball Tournament didto sa Visayan Glass Gym sa Barangay Guadalupe, ning siyudad.
Ang Atan Guardo-Sherilin nagsalig sa ilang naglagiting nga opensa sa nanghinapos nga bahin sa duwa aron pagpukan sa Bambi Cooking Oil sa iskor nga 69-68, samtang ang MJV Builders nag-agi sab og kalisod una nila maangkon ang 59-56 nga kadaugan batok sa El Deneyroe.
Naglisod sa ilang opensa ang Atan Guardo-Sherilin sa nag-unang duha ka kuwarter hinungdan nga nabiyaan kini og siyete puntos paghuman sa first half, 29-36. Apan hinay-hinay kini og ariya sa ilang puntos hangtod nga nailog nila ang momentum ug milabaw kini og kuwatro puntos, 53-49 sa katapusang 10 minutos sa duwa.
Mitubo ngadto sa nuybe puntos ang labaw sa Atan Guardo-Sherilin sa katapusang uno minuto sa duwa.
Nabuhi og balik ang Bambi Cooking Oil human maigo ang crucial 3-point ni Mike Yong diin ang Atan Guardo-Sherilin mi-abante na lang og uno punto. Apan didto ra kutob ang ilang maayong nahimo kay nahutdan na kini sa oras.
PUNTOS MATAG
Atan Guardo-Sherilin (69) - Custudio 27, Murillo 11, Plant 9, Potencioso 8, Antido 8, Lim 4,
Bambi (68) - Yong 24, Villagonzalo 10, Masiglat 9, Sereño 7, Chua 8, Castañeda 6, Alvarez 4
Quarterscores: 16-19, 29-36, 53-49, 69-68
- Latest
- Trending
