Arthro nakasud sa crossover semifinals

Gipaningot una og bogbog ang Arthro Kontra Arthritis sa wala pa nila maangkon ang 25-23 nga kadaugan batok sa University of San Carlos (USC) aron pag-abante sa crossover semifinals sa 2nd M. Lhuillier Kwarta Padala All-Ladies Beach Volley Open niadtong Domingo didto sa Wiggy's Beach Resort sa Lilo-an, Cebu.

Sila si Marites Natad ug Christine Rose Bohol sa Arthro nga gipaluyohan ni Atan Guardo nanglimbasog og maayo aron pagpalagpot nilang Jeremie Montalvo ug Kimberly Ybañez sa USC ug pakig-uban sa Southwestern University (SWU) Team A ngadto sa Final Four.

Ang SWU Team A nga gimaneho nilang Jannelle Tabio ug Florianne Gutierrez miharos og daog sa unom nila ka duwa sa eliminasyon nga ilang gitak-op pinaagi sa pagpatikangkang nilang Krizia Ann Talacero

ug Jackelyn Crisostomo sa Abellana National School (ANS), 25-2.

Ang SWU Team A ni coach Janeth Ponte mi-abante ngadto sa semis isip topseed sa Bracket B bitbit ang baraha nga 6-0 ug gisundan sa Arthro ni coach Thelma Datig nga naglukdo og 5-1 win-loss record.

Kulbahinam nga duwa na sab ang masaksihan karong Domingo diin sila si Jessa Satina ug Lorie Mae Layno sa SWU Team B makigharong batok nilang Erika Camille Verano ug Herlene Ybarita sa University of Southern Philippines Foundation (USPF) Team A sa ilang tinaktakay nga duwa.

Ang SWU Team B, nga kasamtangang nagtangag og 4-1 record, kinahanglan nga modaog batok sa USPF Team A aron dili sayong manamilit sa torneyo.

Kun ugaling molampos, ang SWU Team B makamugna og triple-tie sa Bracket A uban nilang Jusabelle Brillo ug Janez Armie Igot sa defending champion University of the Visayas (UV) ug Michelle Simbajon ug Genie Sabas sa University of San Jose-Recoletos (USJ-R) Team A.

Kun mahitabo kini, si tournament manager Raul Gonzales sa Cebu Volleyball Federation (CVF) nagkanayon nga ilang gamiton ang Olympic quotient system aron pagbuak sa panagtabla ug pag-ila sa duha ka teams nga makaangkon og luna sa semis.