MLKP mipukan sa ANS

Ang mga batos sa MLKP mikulit sa ikaduha nilang sunod-sunod nga daog, samtang ang University of San Jose-Recoletos (USJ-R) Team-A ug  ang Arthro Kontra Arthritis milampurnas sab sa tagsa-tagsa nila ka mga kaatbang sa 2nd M. Lhuillier Kwarta Padala All-Ladies Beach Volley Open didto sa Wiggy’s Beach Resort sa Liloan, Cebu.

Sila si Kennette Garces ug Sarah Miculob sa Team MLKP milansang og 25-21 nga kadaugan batok sa Abellana National School (ANS) aron makig-uban  sa  University of the Visayas (UV) ug Southwestern University (SWU) teams A ug B sa kinatas-ang bahin sa liderato bitbit ang managsamang 2-0 win-loss records.

Nagmalampuson ang MLKP bisan pa og si Miculob nakahiagum og sprain sa tuo niining tiil. Apan si Garces mibanat og maayo aron pagluwas sa adlaw sa MLKP.

Sa laing duwa, sila si kanhi RP Youth members Michelle Simbajon ug Genie Sabas sa Team A mimakmak nilang Leynette Auza ug Renicael Berdon sa RTM ni  Rev. Fr. Rolando T. Manayon, 25-14.

Wala sab magpabitin sila si Marites Natad ug Christine Rose Bohol sa Arthro, apan gipaningot una sila og bogbog sa wala pa nila makuha ang 27-25 nga kadaugan batok nilang Yvonne Verano ug Danika Gendrauli sa University of Southern Philippines Foundation (USPF) Team-B.

Ang USJ-R Team-A ug Arthro ni coach Thelma Datig nagtangag na karon og managsamang 2-1 win-loss records.

Apan mipakugang sa kadaghanan mao ang pambato sa Inayagan sa dakbayan sa Naga nga milampaso sa USPF Team-A nilang Erika Camille Verano ug Herlene Ybarita, 25-22.

Ang usa ka bulan nga torneyo gitukod ni M. Lhuillier Sports Development Foundation (MLSDF) executive director Eddie B. Ybañez ug gipadagan sa Cebu Volleyball Federation (CVF) ubos sa liderato ni Raul Gonzales.