SWU Cobras mibugbog sa Arthro Kontra Arthritis

Gibugbog sa mga koponan sa Southwestern University (SWU) ni coach Janeth Ponte ang tagsa-tagsa nila ka kaatbang aron magpabiling walay pilde human sa ikaduhang adlaw sa 2nd M. Lhuillier Kwarta Padala All-Ladies Beach Volley Open niadtong Domingo didto sa Wiggy’s Beach Resort sa lungsod sa Liloan, Cebu.

Sila si Florianne Gutierrez ug Janelle Tabio sa SWU Team-A mi-ihaw sa mahidlawong Arthro Kontra Arthritis sa tandem nilang Marites Natad ug Christine Rose Bohol, 25-4, samtang sila si Jessa Satina ug Lori Mae Layno  sa SWU Team-B  mimakmak  sa RTM nilang Lynette Auza ug Renicael Berdon, 25-14.

Ang “darling of the crowd” awardee nga si Tabio maoy first runner up sa miaging tuig nga  M. Lhuillier beach volley.  Ang iyang katimbang niadto mao si Natad kinsa atua karon miduwa sa kampo sa Arthro.

Tungod niini,  ang SWU teams nakig-uban na karon sa defending champion Jusabelle Brillo ug Janez Armie Igot sa University of the Visayas (UV) ni coach Rafael ‘Raffy’ Briones  sa liderato sa managsamang 2-0 win-loss records.

Sa laing bahin, ang University of San Jose-Recoletos (USJ-R) ni coach Grace Antigua, ang Sports of Hall of Famer, managlahing napadulngan sa ilang mga duwa.

Ang kanhi RP Youth members Genie Sabas ug Michelle Simbajon sa USJ-R Team-A mibugbog nilang Marissa Lagancia ug Mechelle Matuguina sa Heartvit, apan ang igsuon nilang koponan USJ-R Team-B nga gimaneho  nilang Aina ‘Popsie’ Laroga ug Joy Bonia napukan sa kulbahinam nga 24-26 nga desisyon ngadto nilang Yvonne Verano ug Danika Gendrauli sa University of Southern Philippines Foundation (USPF).

Ang usa ka buwan nga kompetisyon nga gipasiugdahan ni M. Lhuillier Sports Development Foundation (MLSDF) executive director Eddie  B. Ybañez ubos sa superbisyon sa Cebu Volleyball Federation (CVF) pinaagi sa ilang presidente nga si Raul Gonzales mosubay og single round robin format sa elimination round.

Ang nag-unang duha ka teams sa matag bracket moabante ngadto sa crossover semifinals. Ang mga koponan nga mopatigbabaw maoy magsangka sa kampiyonato.