'The Prince' Bullos mipahunong ni Donaire

Gipukan sa Sugbuanong si Cary 'The Prince' Bullos ang mas bug-at pa niyang timbang nga si Tony Donaire sa Republic Gym sa Manila atol sa ilang sangka sa Universal Reality Combat Championships (URCC)-Cebu II nga giulohan og "Visayan Pride" sa miaging gabii didto sa grand ballroom sa  Waterfrot-Cebu City Hotel and Casino.

Si Bullos nagkinahanglan lang og usa ka minuto ug 23 segundos sa unang hugna aron pagtumba sa bisitang si Donaire.

Mosibog unta si Bullos sa maong away human niya masayri nga si  Donaire wala mohimo og regulatory weight limit sa bantamweight  division.  Apan nausab ang  iyang huna-huna kay siya man ang  main event.

Si Bullos kinsa gipaluyohan sa Rusco misuway og pakgang ni Donaire, apan napugos kini pag-usab sa iyang stratehiya  kay bug-at man ang iyang kaatbang. Naigo ni Bullos ang ulo ni Donaire pinaagi sa iyang makusog nga round-house kick ug gisundan sa back fist nga nakatumba sa bisitang mag-aaway.

Si Bullos mibuhi og makabungog  nga suntok nga nakapaaghat ni referee  Anthony Peñalosa paghunong sa away.

Ang 24-anyos nga si Bullos mirehistro na og 10-0 win-loss record diin siyam niini pinaagi sa knockout ug pagsurender.

Sa laing bahin, si Michael Arquillano midaog pinaag walkover batok ni John Armoganda kinsa napakyas  pagtuman sa gipangayo nga weight limit.

Laing pambato sa Sugbu  nga midaog mao sila si Maxlito Yong batok ni Eugene Yongke sa Bacolod  City ug Aaron Paul Guevarra kinsa mipukan sab sa Sugbuanong si Jonomar Macaraya pinaagi sa pagpaundang sa oras nga  3:32 sa unang hugna.