Warriors batok Cobras

Sa tuyo nga dili magwaldas-waldas sa kadalanan ang mga tinun-an , ang Philippine Sports Commission (PSC)  mopahigayon og exhibition game  tali sa University of San Jose-Recoletos (USJ-R) Jaguars ug Southwestern University (SWU) Cobras  nga kabahin sa People Power EDSA 1  karong Pebrero 25 diha sa University of San Carlos (USC) gym.

Matud pa sa event organizer Bernard Ricablanca Jr., ang athletic director sa University of Cebu (UC) nga  ang duwa himuon sa buntag aron dili magkadungan sa National Students Basketball Championships nga buksan sab sa maong adlaw diha sa Cebu Coliseum.

Ang duwa sugdan sa alas-10:00 sa buntag human sa engkuwentro tali sa bag-ong CESAFI women’s division champion USC Lady Warriors ug sa grandslam winner UC Lady Webmasters nga gikatakda sa alas-8:00 sa buntag.

Libre ug walay bayad ang maong duwa ug aduna pa kini pakulo aron paglingaw sa mga tawo nga mosaksi sa duwa.
Si Fr. Vic Uy sa USC, ang bag-ong executive director  sa PSC gipaabot nga mosaksi sa maong duwa uban ni PSC  commissioner Ambrosio de Luna. Si Fr. Uy ang kanhi PRISAA-7 director mao karon ang ikaduhang kinatas-ang opisyal sa PSC sunod ni chairman Butch Ramirez.