PRISAA 2008 andam na

Andam na ang tanan alang sa pagpahigayon sa 2008 Private School Athletic Association (PRISAA) Regional Meet karong Pebrero 8 diha sa Cebu Coliseum.

Apan ang pormal nga kompetisyon unya pa ipahigayon  sa Pebrero 9.

Ang Cebu City Sports Center (CCSC) maoy binyu alang sa athletics, swimming ug sepak takraw, samtang ang badminton adto pagahimuon sa University of San Jose-Recoletos (USJ-R)-Basak campus.

Ang men’s baseball ug women’s softball duwaon sa Labangon Elementary School, ang taekwondo ug chess tigion sa Aznar Coliseum, ang dancesport sa Cebu Coliseum ug ang lawn tennis anha duwaon sa Baseline Sports and Recreation Center.

Sa laing bahin, ang University of San Carlos (USC)-main campus maoy mo-host sa basketball ug table tennis, samtang ang USC-Technological Center sa Talamban maoy binyu sa duwang football.

Ang karatedo himuon sa University of the Visayas (UV) ug ang volleyball adto sa University of Southern Philippines Foundation (USPF).

Mga tournament directors alang sa nagkadaiyang mga duwa mao sila si Victor Intig (athletics), Lerma Binarao (badminton), Dionisio Bacarisas (batted sports), Marvin Ruelan (chess), Jonathan Maximo (football), Roger Requillo (karatedo), Fritz Tabura (lawn tennis), Dr. Gil Ramas (swimming), Loren Wajad (table tennis), Rene Brojan (taekwondo), Chris Mejarito (sepak takraw),

Raul Gonzales (volleyball)

ug Victor Cuenco (dancesport).

Molamas sa tulo ka adlaw’ng athletic meet nga salmotan sa mga dekalibreng collegiate athletes sa Cebu, Bohol ug Negros Oriental mao ang pagpili sa “Mutya ng PRISAA-VII” diha sa USJ-R main ug ingon man academic ug cultural contests.