Motocross sa Liloan

Ang 2008 edition sa MS Motosuit Motocross Series, ang labing daku nga motocross event sa habagatang bahin sa Pilipinas  mo-ulbo karong buntag didto sa Sitio Tubura sa Jubay, Liloan, Cebu.

Dili momenos 50 ka daredevils gikan sa Sugbu ug sa ubang bahin sa Visayas ug Mindanao ang mopakita'g aksiyon sa maong kompetisyon nga ulohan og "Barangay Captain Manuel Wagas Cup."

Si Jubannie Abellar, kinsa gikoronahan isip 2007 MS Motosuit's "Rider of the Year"  (ROY) kagabii didto sa  Grand Convention Center of Cebu  seguradong maoy masentro karong adlawa.

Niini nga season, ang organizers nga gipangulohan sa tinahod nga sports patron Lou Ornopia mihimo og kausaban sa pagpili alang sa ROY award. Inay nga mo-focus lang sa experts class, ning higayona ang mga puntos na sa mga riders gikan sa ubang  kategoriya ang sukaranan  paghagpat og Rider of the Year.

Gumikan niini, ang riders sa ubos nga dibisyon madasig sa pagtigi dili lang sa paghari sa ilang tagsa-tagsa ka dibisyon, kondili pagdaog sa  ROY award.

Ang MS Motosuit Motocross Series ning tuiga aduna nay kinatibuk-ang 12 ka legs.