"Now or Never" gipasigarbo
Ang ALA Promotions uban sa Solar Sports mapasigarbuhon nga mipahibalo sa dakung kalihukan sa boksing nga ulohan og “Now or Never” nga gikatakda karong Pebrero 2 diha sa Pacific grand ballroom sa Waterfront-Cebu City Hotel and Casino sa barangay Lahug, ning siyudad.
Mangulo sa blockbuster show mao ang IBF super flyweight eliminator tali sa Sugbuanong si Z ‘The Dream’ Gorres ug Armenia-born Australian nga si Vic ‘The Raging Bull’ Darchinyan.
Nalakip sab sa maong promosyon mao ang Sugbuanong boksidor, kinsa nakahatag og dungog sa mga Pinoy sa natad sa boksing.
Si RP light welterweight champion Mark Jason Melligen moladlad sa iyang abilidad batok sa Indonesian champion Tia Koswara.
Sa special bouts, si Romeo Jakosalem sa Davao City moharong batok ni William Kickitt sa Sydney, Australia, samtang si James Bacon sa ALA Gym makigsinukliay og kumo ni Diosdado Perez sa Dagdagen Stable sa Manila.
Sa undercards, ang Fil-Am nga si JV Tuazon sa New Jersey makigbinukbukay ni Rey Villar sa Sultan Kudarat, si Rollen ‘Rockin’ del Castillo sa ALA Gym makigsangka ni Fabio Marfa sa Mandaue City ug laing Mandauehanon nga si Alejandro Belonguel makigpinaksitay ni Ruel Cuizon sa Dagdagen Stable sa Manila.
“This card will definitely thrill you to no end,” pasalig ni Dennis Cañete, ang ALA Boxing Gym vice president for promotions.
Ang mga tiket nagkantidad og P3,000 alang sa VIP reserved seats (1st row), P2,500 alang sa VIP (2nd row), P2,250 alang sa VIP (3rd row), P2,000 alang sa VIP (4th row), P1,500 sa ringside, P500 sa ballroom ug P300 alang sa balcony.
Mapalit na ang maong mga tiket sa mosunod nga mga outlets: ALA Gym sa Nasipit, Talamban;
Alang sa dugang kasayoran, mahimong motawag o text ni Brent sa 0917-3253005 o sa ALA Gym-BTC at 416-2011 o 346-3489.
- Latest
- Trending
