UV di na sab moduwa sa PRISAA

Sa ikatulong sunod-sunod nga tuig, ang University of the Visayas mibalibad nga dili morepresentar sa Sugbu sa basketball competition sa 2008 PRISAA tungod sa nag-unang mga commitments.

Gumikan niini, ang University of  San Carlos  aduna na  say purohan nga moduwa  sa  Cebu alang sa  regional meet nga gikatakda karong Pebrero 6-10 dinhi sa Sugbu.

Isip Cebu Schools Athletic Foundation, Inc. (CESAFI) basketball champions sa men  ug women divisions, ang UV nakakuha og automatic slot nga morepresentar sa Sugbu, apan ang maong unibersidad  mihukom nga dili gihapon kini mosalmot sa maong kompetisyon.

Bisan og nagsubo ang PRISAA officials  sa  gipakanaog nga desisyon sa UV,  gibati sab gihapon og diyutay kalipay kay ang athletic moderator sa UV nga si Chris Mejarito sayo man nga  mipahibalo sa desisyon sa tunghaan.

Sa miaging tuig ang USC maoy nihulip sa UV human ang naulahi mi-atras kay dili kompleto ang ilang team.