USPF mi-rally, nagmadaugon
Nakabangon ang USPF/R. Lapid's Chicharon gikan gilubong og 20 puntos dihang mi-rally kini aron pagposte og 84-77 nga kadaugan batok s CIT/Metro Gaisano sa pagbalik sa aksiyon sa Reinforced Partner's Cup kagahapon didto sa Cebu Coliseum.
Ang USPF Panthers gidapog og 20 puntos nga lubong, 36-56 pagsugod sa third period. Apan bisan pa sa lawom nga labaw, ang Panthers nakahimo gihapon pagkitkit sa labaw human kini milusad og duha ka rallies. Ang Panthers ubos sa pagpangulo ni Bogart Nemenzo mikawhat og 9-0 run aron pagpahiyos sa labaw ngadto na lang sa 11 puntos, 45-56 ug ila pa kining naibanan sa iskor nga 55-67.
”Ako silang gi-ingnan nga ayaw mo’g kahadlok anang 20 puntos biya. Ato nang apason basta mo-depensa lang ta’g tarong”, matud pa ni coach Raul Latonio.
Ang USPF/R. Lapid's Chicharon nakatilaw na og daog sa ilang upat ka duwa.
Ang hugot nilang depensa maoy nakapagusbat sa duwa sa CIT Wildcats diin didto nagsugod ang pag-rally sa Panthers.
Padayon nga mipatuman sa ilang hugot nga depensa ang Panthers sa fourth quarter hangtod nga nailog nila ang labaw human sa triple ni Dennis Tabada, 73-70 sa nahabiling 4:00 minutos sa duwa.
Nahimong kulbahinam ang duwa dihang igo lang milabaw og tres puntos ang Panthers, 80-77 sa katapusang 29 segundos sa duwa apan si Elvis Labares nakakawat og bola ug dayong hatag ngadto ni Tabada alang sa solo lay-up aron pag-inat sa labaw.
Si Labares mitibawas sa oras pinaagi sa iyang crucial charities aron pagselyado sa duwa.
Si Labares maoy nangulo sa USPF nga mibugha og 18 puntos, gisundan ni Nemenzo nga miabuno og 13 puntos samtang si Tabada miani og 12 puntos.
Puntos Matag
USPF/R. Lapid’s (84) -- Labares 18, Nemenzo 13, Tabada 12, Bardilas 12, Rizane 7, Avila 5, Mercader 5, Sereño 4, Paradero 4, Muñez 2
CIT/Metro Gaisano (77) -- Jaca 16, Montealto 10, Guangco 10, Dela Cerna 9, Abobo 7, Reyes 7, Ocañada 5, Capaning 4, Molero 4, Estrada 3, Lopez 2
- Latest
- Trending
