Pagpauyon sa lawas

Sa pagdula og bilyar, kinahanglan nga ipahiluna gayod pag-ayo sa magdudula ang iyang tayada aron dili siya mosipyat. Matud pa sa mga eksperto sa maong dula, kinahanglan nga mapauyon ang lawas sa posisyon sa pagpanako aron mas komportable ang magdudula ug mas relaks siya sa iyang pagpahigayon sa usa ka tayada.

Gikinahanglan man gud sa dulang bilyar ang eksaktong paghatag og relaks sa kaugalingon atol sa pagpanako. Kini aron maseguro nga makapahigayon gayod ang magdudula og hustong pagtira. Aron mapunting niya'g maayo ang bola nga buot niyang tirahan. Kun dili maayo ang pagkapahimutang sa lawas, lisud usab alang sa usa ka magdudula ang pagpahigayon og epektibong tayada.

Ang pagpauyon sa lawas importante kaayo. Usa man gud kini sa mahimong basehanan sa ka-epektibo sa usa ka tayada. Matud pa sa respetadong sportsperson nga si Ashok Kumar, kinahanglan nga ibutang kanunay sa magdudula ang iyang kaugalingon sa mas komportableng sitwasyon atol sa iyang pagdula. Buot ipasabot ni Kumar nga kinahanglang dili motira ang magdudula sa posisyon nga bikil sa iyang lawas tungod kay makaapekto kini sa pagdagan sa bola nga maigo sa pagtira.

Tinuod nga adunay daghang magdudula nga mopakita'g hilas pinaagi sa pag-exhibiton. Motira sila sa posisyon nga sa atong pagtan-aw daw sa lisud ug bikil kaayo sa lawas. Pero ang tinuod, dili lisud alang kanila ang maong posisyon. Nagbansay sila niini sulod sa taas nga kutay sa panahon busa maingon tang hanas ug eksperto na sila sa maong estilo sa tayada.

Pananglit, adunay tira diin ang tako adto ipaagi sa luyong bahin sa lawas sa magdudula. Sa una pa lang nimong pagtan-aw, makaingon ka nga lisud ang maong estilo sa tayada. Kun mapasulod sa magdudula ang bola ngadto sa pocket pinaagi sa maong posisyon, tingali modayeg ka pag-ayo sa iyang katakus.

Pero ang tinuod,  dili kadto lisud alang sa magdudula nga hanas sa paghimo og ingon niadto nga tayada. Kini tungod kay iya man kanang gitun-an sa wala pa kini niya i-apply sa iyang pagdula. Iya unang gibansay pag-ayo ang iyang kaugalingon sa wala pa kini niya gamita sa iyang pag-apil og torneyo. Labaw sa tanan, komportable na ang iyang lawas sa maong matang sa tayada.

Mao nga angay gayod timan-an sa magdudula nga panahon sa matchplay, dili gayod angay mangahas sa paghimo og tayada kun bikil ang iyang lawas. Dili maayong irisgo sa magdudula ang iyang kaugalingon pinaagi sa paghimog exhibition nga walay kasiguroan. Mas makapahisagmuyo ang resulta niini. Apan kun mahanas na ang magdudula sa pagpauyon sa iyang lawas sa bisan unsang posisyon sa tayada, iyang madiskubrehan nga mas komportable siya sa pagdula sa nagkadaiyang mga posisyon. Sulayi kini, Bords!

* * *

(Mga sugyot ug pakisayod? Text sa 0910-8105522)