UC-Aspac Bank milansang og daog

Nakahimo pa sa pagdaog  ang UC-Aspac Bank   human kini mabiya-i sa biyahe  pinaagi sa pagpilde sa USPF/R. Lapid's Chicaron sa iskor nga 102-92 sa nagpadayong Reinforced Partner's Cup kagabii didto sa Cebu Coliseum.

Sama sa bangis nga tigre, ang 6'7" nga si June Mar Fajardo mipakita sab sa iyang kabangis ug   gipahimuslan ang iyang gitas-on  batok sa  mga batan-ong kaatbang aron pangulohan ang UC/Aspac Bank.

Si Fajardo milansang og 24 puntos ug ang iyang katapusang  iskor pinaagi sa slam dunk sa nahabiling uno segundo apan gitawagan kini og technical foul tungod sa iyang pagkumpayot sa rim.

Ang batan-ong Panthers maoy nikontrolar sa  nag-unang duha ka kuwarter diin milabaw kini og dos puntos, 42-40 sa halftime.

Mikiat og maayo ang Panthers sa ikatulong kuwarter  dihang mipatuman kini sa ilang offensive set-ups. Apan  kalit lang nga  miok-ok ang Panthers dihang ang  maisugong UC Webmasters mipahungaw sa ilang kainit aron pag-ilog sa labaw, 57-56  sa nahabiling 3:02 sa third period.

Gikan niadto hinay-hinay na nga gikontrolar sa UC ang duwa dayon na pagkulit og daog.