Abanteng duha ka opening

Sa dulang billiard, gikinahanglan sa usa ka magdudula ang pagseguro og abante nga mga opening sa iyang pagdula aron pagtino nga magpadayon siya sa pagkontrolar sa ibabaw sa lamesa sa mosunod nga mga hugna sa dula.

Si Ashok Kumar, tagsulat sa librong Snooker and Billiards, miingon nga ang usa ka magdudula kinahanglan nga sa una niyang pagtira, kinahanglan nga iyang seguroon nga ang mao niyang tayada makaseguro sa paghatag kaniya'g duha ka abanteng opening aron pagtuman sa iyang preparasyon.

Ang buot ipasabot ni Kumar nga sa dili pa ipahigayon sa magdudula ang una niyang tayada, kinahanglan nga sutaon una niya kun ang maong tira makahatag ba kaniya'g laing kahigayonan sa pagtira. Labing menos duha ka advance nga tayada aron pagseguro og dakung bentaha.

Sa dulang billiard, ang unang makabentaha maoy daku'g kahigayonan nga modaog. Mao kini ang hinungdan nga kinahanglang paninguhaon sa magdudula nga makakamada gilayon og puntos sa arangkada pa lang sa dula aron pagseguro nga lisud na siyang pildihon sa iyang kaatbang.

Ingon niini ang kinaiya sa banggiitang bilyarista nga si Earl 'The Pearl' Strickland. Gusto siya nga sa unang hugna pa lang sa panagsangka, makakamada dayon siya og score tungod kay nasayod na siyang daan nga sa higayon nga siya ang makauna sa pagkuha sa bentaha, mopabor na kaniya ang sitwasyon.

Kanang maong pabor angay pahimuslan sa magdudula. Sa higayon nga makakuha na siya'g bentaha sa iyang kaatbang, kinahanglan nga pahimuslan niya ang tanang higayon sa pagpahigayon og epektibong mga tayada. Kinahanglan nga dili siya maghuna-huna og lain gawas sa pagpaninguha nga dili mosipyat ang iyang tayada aron magpadayon ang iyang pagdominar sa ibabaw sa lamesa.

Dili angay maghuna-huna ang magdudula nga tungod kay labaw siya'g score sa iyang kaatbang, angay na siyang mokompiyansa. Dili gayod angay mokompiyansa ang magdudula samtang dili pa matapos ang dula. Kinahanglang hugtan niya ang iyang bakus aron pagseguro nga walay makabanos kaniya paglingkod sa driver's seat.

Usa sa angay timan-an sa magdudula mao ang kamatuoran  nga sa higayon nga dili na iyang turno ang pagtira, bisan unsa ka daku sa puntos nga iyang labaw, dili na siya makaisip sa iyang kaugalingon nga maoy nagkontrolar sa lamesa. Kay sa tinud-anay lang, ang magdudula nga naggunit sa tako maoy adunay katungod sa pagkontrolar sa lamesa.

Maong kinahanglan nga dili siya molugak. Ipadayon niya ang pagpahigayon og epektibong mga tayada aron magpadayon usab siya sa pagkontrolar sa lamesa. Kana maoy tinuod.

* * *

(Mga sugyot ug pakisayod? Text sa 0910-8105522)