Pacquiao-Marquez rematch adto sa Mandalay mahitabo

PASAY CITY – Kompirmado na. Ang Golden Boy Promotions ni Oscar de la Hoya ug Top Rank Inc. ni Bob Arum mipahibalo kagahapon nga si Pinoy ring star Manny Pacquiao mohagit ni WBC super featherweight champion Juan Manuel Marquez sa Mexico sa usa ka eksplosibong rematch karong Marso 15 didto sa Mandalay Bay Resort and Casino sa Las Vegas.

“This is the one everybody wanted to see,” matud pa ni Golden Boy CEO Richard Schaefer segun sa taho ni Dan Rafael sa ESPN.com.

Sa wala pa makahukom nga harungon si Marquez, si Pacquiao naghuna-huna nga mokatkat sa mas taas nga timbang aron hagiton si WBC lightweight champion David Diaz. Apan si Pacquiao misangon sa yangongo sa mga boxing fans tibuok kalibutan nga makigtakos siya og usab ni Marquez.

Sa una nilang engkuwentro niadtong Mayo 8, 2004 didto sa MGM Grand sa Las Vegas, si Pacquiao mipalukapa ni Marquez tulo ka higayon sa unang hugna, apan nakatusik pa og balik ang Mehikano aron pagtabla human sa 12 ka hugna nilang binukbukay.

Alang ni Arum, si Pacquiao lahi na kaayo karon nga boksidor ug sa iyang tan-aw hayan pakatulgon niini si Marquez ning higayona. “Manny is going to knock him out. Manny feels that he has really improved dramatically since that first fight with Marquez and that Marquez has gone backwards,” matud pa ni Arum.

Nagkanayon si Arum nga mopahigayon sila og usa ka press conference aron pormal nga ipahibawo ang Pacquiao-Marquez II karong Disyembre 20 didto sa Los Angeles. Wala gibutyag ang mga nalatid sa kontrata, apan daghan ang nagtuo nga si Pacquiao modawat og dili mominus  US$5 million nga premyo. Gidayeg hinuon ni Schaefer si Marquez gumikan kay wala kini magpa-presyo aron lang mahitabo ang away.