Maayong klase sa tako

Usa ka magbabasa ning lindog mi-text nga nagkanayon: "Good day. Ask lang unta ko kun asa ta makapalit og maayong klase nga tako. I'm Ryan of Bogo." -- 0928-3975795 (Sent: 02:46:27 pm -- October 30, 2007)

Daghang salamat sa imong text. Hinaot unta nga kamong taga Bogo City magpadayon pag-patronize sa akong mga lindog ug sa Banat News in general.

Karong panahona makapalit ta'g tako bisan asa nga tindahan sa sports accessories. Labina gyud sa mga mall. Sulayig susi diha sa  mall sa inyong dapit. Ang kamaayo sa klase sa tako usa sa angay basehan sa pagpalit niini. Pero importante pud nga ikaw mismo makauyon sa maong tako.

Adunay tako nga maayo'g kalidad pero posibleng dili mohaom sa imong estilo sa dula. Labing maayo nga estudyohan ug susihon nimo'g maayo ang tako nga imong paliton aron pagseguro nga mohaom kini sa imong estilo. Kun dili kini mohaom, lagmit nga dili ka komportable sa paggamit niini. Bakikaw ang imong pagdula. Ug kun ingon niini ang kaso, lagmit dili epektibo ang imong pagdula gamit ang maong tako.

Angay gyud seguroon nga komportable ka sa tako nga imong gamiton aron paglikay sa daghang kakulian panahon sa pagdula. Diha sa pagpalit, angay nang seguroon nga ang tako mohaom gayod sa kaugalingon mong estilo sa pagdula.

* * *

Karong tuiga hapsay ang dagan sa career sa atong mga bilyarista. Kini tungod kay daghan kaayong mga torneyo nga gipasiugdahan sa lain-laing dapit sa atong kapupud-an ug ingon man didto sa gawas sa nasud.

Daghan sa atong mga bilyarista nga wala na manulong sa laing kanasoran kay aduna man usay daghang mga torneyo nga gilusad didto sa Luzon

ug ingon man sa Kabisay-an ug Mindanao nga nagtangag og dinagkong mga ganti.

Kun magpadayon kini, mosamot ang kasibot sa atong mga bilyarista pagbakyaw sa ilang tako. Mosamot kalagsik ang billiard sports sa atong nasud.

* * *

(Mga sugyot ug pakisayod? Text sa 0910-8105522)