Pacman mikulata sa CECABA
Misuwaw og maayo ang kahigayonan sa Team Pacman ni boxing superstar Manny Pacquiao nga mopaso sa crossover semifinals human gipilde ang Cebu Eastern College Alumni Basketball Association (CECABA) sa iskor nga 103-96 sa 1st MP Cup Invitational basketball niadtong Domingo didto sa University of San Carlos (USC)-main gym.
Nanginit dayon ang Team Pacman pagsugod sa kumbati ug milabaw kini og 20 puntos, 73-53 sa sayong bahin sa third quarter.
Ang CECABA luyo sa paningkamot nilang Richard Yu, Edwin Kaw, Richard Lanutan ug Mitchel Diputado, milaslas sa higanteng labaw ngadto na lang sa tres puntos, 92-95 sa nahabiling tres minutos sa duwa.
Sa tinguha nga makalingkawas ug moposte og daog, si CECABA coach Calvin Tuadles mipasulod ni top hitman Chester Cokaliong sa katapusang dos minutos sa duwa. Apan ang gikaintapang si Cokaliong gipagawas sa korte dihang nakaangkon kini og gamay’ng gisi sa iyang agtang human maigo sa siko ni Yu.
Wala makabuylo si Cokaliong tungod sa grabeng kahugot sa depensa nga gipatuman nilang Jingjing Rama ug Tata Baclay. Si Cokaliong gilimitahan lamang og
Si Louie Navarro maoy topscorer sa iyang 20 puntos, gisundan ni Baclay nga mikulit og 17 puntos alang sa Team Pacman, kinsa wala na molingi pa human milabaw og 14 puntos sa halftime sa iskor nga 57-43.
Laing upat ka players ang milansang og double figures sa Team Pacman nga nagbinugtong sa ikaduhang dapit sa Bracket A nga adunay 6-1 win-loss record.
Sila si Noel Talas ug Joel Gallego miamot og 14 puntos, samtang si Rama mitampo og 13 puntos ug si Pumareja midonar og 11 puntos.
Si Diputado nga mihipos og 19 puntos, samtang sila si Yu, Kaw ug Lanutan nagkumboya og 47 puntos alang sa CECABA napunta sa ikatulong dapit uban ang 5-2 win-loss record.
Sa laing duwa, ang dinaog-daog nga Cebu Sports Media Association (CSMA) Hoopsters gipahamtangan na usab og laing kaparotan batok sa Club Monday sa iskor nga 76-79.
- Latest
- Trending
