Pamatian napunta sa ikatulong dapit

Napunta sa ikatulo nga dapit si Odong Pamatian atol sa senemanang eliminasyon alang sa luna sa Cebu darts team nga moduwa sa P1M Governor’s Cup Darts Championship didto sa Cabadbaran, Agusan del Norte.

Si Pamatian maoy nag-una   human nidaog sa duwa niadtong Biyernes apan nalagpot sa ikatulo sa Sabado nga   mga duwa nga gidominar ni William Encorporado didto sa Baseline Sports and Recreation Center.

Si Encorporado  nigukod human maunhi ni Alvin Villa aron pag-angkon sa 2-1 nga kadaugan sa ilang kumbati sa final.

Si Villa, kinsa nakabaton og twice-to-beat advantage, nidaog sa unang duwa, apan si Encorporado nakatabla sa duwa pinaagi sa pagdaog sa ikaduhang duwa.

Sa deciding game, si Villa maoy unang miabante, apan si Encorporado mipakita sa iyang abilidad aron pagdimdim sa kadaugan.

Si Roy Laude, kinsa nangandoy sab nga maapil sa team, nitapos sa ikaupat.