3 ka duwa giharos sa Liloan

Giharos og daog sa Liloan volleybelles ang ilang mga duwa aron paglangkat sa cluster VI championship sa 3rd Governor Gwen Garcia Unity Volleyball Cup niadtong Domingo didto sa Liloan Sports Complex.

Ang Liloan mipabuhagay og maayo sa ilang kusog  pagpukan sa Consolacion, Cordova ug Compostela sud sa straight sets aron matambalan ang tulo ka tuig nilang kaibog sa titulo.

Ang Liloan mikati og daog batok sa Consolacion, 25-14, 29-9. Gisunod usab nila og pilde ang Cordova, 25-13, 25-16 ug dayon ang Compostela, 25-19, 25-15.

Ang Compostela nitapos sa ikaduha nga adunay 2-1 win-loss nga baraha human nila gipukan ang Cordova, 25-15, 25-19 ug Consolacion, 25-10, 25-14.

Ang Liloan ug Compostela nakakuha og katungod nga morepresentar sa cluster VI sa semifinal round nga gikatakda sunod semana.

Sa maong kadaugan, ang Liloan nakadawat og P20,000 nga ganting salapi, samtang ang Compostela nibulsa og P10,000.