Martus miangkon sa unang titulo

Ang National team member nga si Teodoro Martus mipakita sa iyang kahanas sa kapulongan pinaagi sa pagdaog sa 1st University of the Visayas Scrabble Challenge sa  miaging adlaw didto sa SM City Cebu.

Napuhalan sa abilidad ni Martus ang  top seed  ug kauban niya  sa nasudnong koponan Odette Rio sa ikawalo ug final round aron pag-ani og siyete puntos.

Sila si Martus ug Renz Yamson sa UV nagtabla human sa final round apan  si Martus maoy nakaangkon sa titulo human sa tiebreaker. Si Martus miani og 682 spread points, samtang si Yamson mihipos lamang og 532 puntos.

Mitapos sab hinuon si Yamson sa taas nga dapit human midaog sa iyang katapusang duwa batok sa teammate niining si Sheena Denden.

Ang coach sa University of Cebu (UC) nga si Dart Eslao mipahiluna sa ikatulo nga dapit human mitali og sayes puntos ug 675 spread points. Ang lawom nga kinaadman maoy gihimong yawi ni Eslao  pagpukan ni Renante de la Cerna sa katapusang hugna. Sila si Eslao ug Rio nagtabla sa ikatulo apan si Eslao maoy mipatigbabaw tungod sa iyang dakung nahipos nga spread points human sa tiebreaker.

Si Martus mibulsa og P5,000 sa iyang kadaugan, samtang si Yamson nakakuha og P3,000 ug si Eslao nakadawat og P2,000.

Nasakay sa top 10 mao sila si Michael Laput, Rolly Navarro, Michael Trinidad, Sheena Denden, Avelino Guatno ug Renante de la  Cerna.