200 ka players gipaabot magsambunot

Andam na ang tanan alang sa ipahigayong 16th Erne Jawad Memorial Table Tennis Championships sa Activity Center sa Elizabeth Mall, ning siyudad.

Kapin sa 200 ka table tennis players gikan sa Visayas ug Mindanao ang gipaabot nga mopakita'g aksiyon sa maong kalihukan.

Ang National team members ug training pool gilauman sab nga mosalmot, apan si event organizer Jessica Jawad-Honoridez mibutyag nga adunay pagahimuong try-out alang sa SEA Games representative sa Manila sugod karong adlawa aron maahat  ang mga magduduwa sa pagsalmot sa maong kompetisyon.

Bisan pa niini, aduna nay mga magduduwa gikan sa Tacloban, Bacolod, Cagayan de Oro, Leyte ug uban pa ang mikompirmar sa ilang partisipasyon.

Ang mga magduduwa bahinon sa nagkalain-laing mga kategoriya lakip na ang men ug women's open, boys ug girls' 17-under ug ang 12-under.

Dul-an sa P23,000 nga ganting salapi ang ipang-apod-apod sa mga top performers sa maong torneyo nga gipaluyohan sa J&L Enterprises, Roel Simon Cerna, Lamitan mayor Roderick Furigay, Creamy Delights, Clinica de Lamitan, J.O. Construction, University of Cebu, Elizabeth Mall, Alfonso Albaño, Richell A. Cortes, Weatherbank-Mandaue ug  JYPKO Friends of  Foundation Society of Japan.

Ang registration fee nagkantidad og P100 diin ang  unang 100 registrants makadawat og t-shirt.