Pinaksitay na karong gabii: Ground & Pound III Mixed Martial Arts and Kickboxing National Championship Supreme Challenge

Ang mga Cebuanos kinsa adik kaayo sa sports makasaksi nausab og laing puno sa aksyon nga seguradong moresulta unya sa duguong ingkwentro sa Ground & Pound III Mixed Martial Arts and Kickboxing National Championship Supreme Challenge karong alas 6:00 didto sa Cebu Coliseum.

Unang magpinaksitay sa maong Mixed Martial Arts showdown nga gitukod ni Yaw-Yan ArDigma Martial Arts Federation, Inc. ubos sa panigkamot ni Master Benigno “Ekin” Caniga, Jr., mao silang Cebuano fighters Jeffrey “Marc Hojas” Alcaraz ug Engei “The Destroyer” Piloto kinsa pulos nag-atubang karon og malisod nga tahas tungod sa kalig-on sa ilang mga kaatbang.

Si Alcaraz, kinsa temporaryong nagbase sa Cagayan de Oro City diin siya nagserbisyo isip computer programmer, mohamag ni Cebu-based American national Kyle “Superman” Thomas, samtang si Piloto sa Yaw-Yan ArDigma Cebu makigbinukbukay ni Elmer “D Hammer” Jandayan sa Bohol Sagravate Pitfighting Society sa laing eksplosibong superfight.

Silang Alcaraz ug Thomas adunay grand entrance diin ubanan sila sa mga police interns samtang ang nahabiling partisipante magbitbit sa ilang national flags sa ilang pagmartsa paingon sa ring. Mao usab kini ang unang higayon sa karon nga henerasyon nga ang Star Spangled Banner, ang national anthem sa United States of America, ipalanog sa maong pasundayag dinhi sa Cebu.

Laing lima ka parisan nga giatangan tungod kay seguradong magkarambola, mao silang Maxlito “Hyper Eagle” Yong sa Yaw-Yan Musang batok Tata Galendez sa Muay-Thai Butuan, Junjie “Young Hercules” Abellana sa Calma Stable batok Nards “D Fire” Hernaez sa Dugukan Martial Arts, Albert “Guko” Estomago sa C-Mac Kickboxing Club batok Danilo “D Crusader” Teves sa Calma Stable, Justin “The Evangelizer” Padillo sa Calma Stable batok Eric “Bakki” AREGLADO sa C-Mac Mix Lapu-Lapu City ug Rene “D Thunder” Taño sa Arcomjukai Kickboxing Club batok Demetrio “D Standard” de la Torre sa C-Mac Kickboxing.

Si Jay-R “Matador” Villagracia sa Yaw-Yan ArDigma Makati, sa laing bahin, mao usab ang gikahinaman sa iyang mga dumadapig nga makigtakos ni Jobert “D Survivor” Baylin sa Wushu-Sanchou Club sa Cagayan de Oro.

Nakapadugang karon og kainit sa aksyon itandi sa miaging Ground and Pound extravaganza mao ang pagpuno sa knee strikes ug elbow strikes.

Si Michael “Buhawi” Duncan, laing dayo gikan sa Manila sa Yaw-Yan ArDigma Makati, moasdang ni Robert “D Lighting” Taño sa Mandaue’s Arcomjukai Kickboxing Club. Si Taño maoy kanhi amateur standout sa ALA Boxing Gym.

Nikompleto sa kickboxing bouts, si Noble “The Jet” Ampoc sa Yaw-Yan ArDigma Makati batok Victor Altarman” Catubig sa C-Mac Kickboxing Club, Leo “Golden Boy” Gaerlan sa Yaw-Yan Musang batok Allan “D Remover” Orong sa Fit Martial Arts, Carlos “Spartas” Hernandez sa Yaw-Yan Musang batok Junjun “D Bull” Ricablanca sa Bohol Sagravate Pitfighting Society, Walter “Singha” Zaldarriaga sa Muay-Thai Dumaguete batok  Argel “D Phantom” Oppus sa Arcomjukai Kickboxing Club, Joric “Kidd” Rivera sa Soma Kickboxing Club batok  Leonard “D Energizer” Nicanor sa Talisay City’s Black Scorpion Kickboxing Club ug Jessie “D Iceman” Adbada sa Cmac Kickboxing Club batok ni Alson “Gladiator” Bulao sa Muay-Thai Las Piñas.

Seguradong dili magmahay ang tanang mosaksi sa maong torneyo tungod kay ang mga talento sa INTV-CCTN 47 modugang og laing kalingawan nga mo-show og Cebuano teleserye nga giulohan og “Tigas”, samtang ang garbo sa Sitio Granada nga si Allan “Goliath” Nacorda mohamag ni do-or-die fighter Nilo Anhao alang sa tulo ka hugna nga paugatay.

Ang mga tickets mapalit didto sa Cebu Coliseum ug sa Yaw-Yan Cebu ArDigma headquarters sa room 304 of Villacampa-Capuras building atubangan sa University of Cebu (UC)-Main campus nga naa mahimutang sa Sanciangko Street,ning dakbayan.