Cotton Village hari sa CJSL
Wala gyud magmahay ang mga fans sa matag koponan nga nisaksi sa maong engkwentro sanglit init ug eksplosibong aksyon ang gidalit sa duha ka kampo, daw walay gustong magpapilde atol sa unang duha ka kuwarter tungod sa kasikit sa iskor, gani nagtabla ang iskor sa 19-19, human sa unang kuwarter ug igo lang nakabentaha ang Cotton og dos puntos, 45-43, sa unang tunga.
Nakaginhawa og gamay ang Cotton sa maong duwa dihang nakalabaw sila og 8 puntos, 68-56, kortesiya ni Torjo Alic kinsa nihungit og tulo ka sunod-sunod nga lay-up sa tunga-tungang bahin sa katapusang kuwarter, apan sa wala damha nitapon ang momentum ngadto sa Bangaan ug nakasikit sa iskor nga 70-73, ubos nilang Jojo Medellada ug ni Enrique Manayon sa nahabiling 3:45 sa duwa.
Apan didto ra kutob ang utong sa Bangaan tungod kay silang Judy Labrador, Darwin Laborada, Joey Obcinal, nipahagtos og mga puntos aron pagkandado sa maong kalamposan.
Sa maong kadaugan, ang Cotton nakasulod sa finals bitbit ang barahang 4-0 win-loss records bisan pa man og mapilde sila sa ilang katapusang duwa batok sa Upper Cuanos samtang ang Bangaan nga dunay 3-1 win-loss records kinahanglang modaog sa ilang katapusang duwa batok sa Proper Cuanos aron hingpit nga makasulod sa finals.
Si Labrador nipaslak og 25 puntos, 13 ka rebounds ug 5 ka blocks alang sa Cotton, samtang silang Laborada nitampo og 15 puntos ug si Obcinal nipunting og 12 lakip na niini ang upat ka sunod-sunod nga birada sa ikatulong kuwarter nga maoy nakapadasig sa Cotton.
Sa pilderong Bangaan gipangunahan ni Medellada nga nipusa og 20 puntos, 5 ka rebounds ug 4 ka assist.
- Latest
- Trending
