CDO-Hamburger-UV, 2-0 na

Nag-ong-ong na karon sa ganghaan sa himaya ang CDO Hamburger-UV Green Lancers human nila maangkon ang laing kadaugan batok sa VFI Hotdogs-USJR Jaguars, 85-80, sa Game-2 sa ilang "best-of-five" CESAFI-Partner’s Cup finals sa miaging gabii diha sa Cebu Coliseum.

Ang Lancers nga kasamtangang nagtangag og 2-0 na sa serye nagkinahanglan na lang og usa ka daog aron hingpit na nilang maangkon ang titulo sa kampiyonato.

Ang Game-3 gitakda ugmang adlawa sa alas-5:00 sa hapon diha sa Cebu Coliseum.

Lahi unya ang panagway sa Game-3 tungod kay ang CDO Burger-UV walay Rino Berame nga moduwa, samtang wala say Randy Pogoy nga moduwa sa VFI tungod kay pulos kini gipahamtangan og usa ka duwa nga suspensiyon dihang gi-eject kini sa Game-2 tungod sa ilang panagbangi sa nahabiling 3:18 sa ikatulong kuwarter diin ang Lancers naglabaw og 12 puntos, 52-40.

Bisan wala na makabalik og duwa si Berame sa tibuok fourth quarter, ang CDO Burger-UV Lancers nakahimo gihapon pagkontrolar sa duwa ug gani ila pa nga giinat ang labaw ngadto na sa 22 puntos, 66-44.

Apan ang pagkawala ni Berame sa Game-3 seguradong makahinay sa opensa sa CDO Burger-UV ug ang Jaguars dili kaayo makasugat og kalbaryo sa pagkawagtang ni Pogoy tungod kay anaa pa man silang John Malinao, Armand Ponce, Lyndon Gudez ug Luther Justiniani nga nakahimo og dakung kausaban sa ilang outside shooting.

Si Jerome Ong, ang team owner sa CDO-UV gipaabot nga mosaksi sa duwa ugmang adlawa aron mapun-an ug madasig og maayo ang iyang mga batos.

Si Morsie Akad maoy nangulo sa CDO Burger-UV Lancers uban sa iyang 18 puntos, samtang si Von Harry Lanete miburak og 16 puntos ug si Bomber Sendrijas adunay 15 puntos diin 12 niini iyang nakutlo sa ikatulong kuwarter.

Si Berame igo lang niamot og kuwatro puntos sa Lancers, samtang si Pogoy adunay dos puntos alang sa pilderong Jaguars. — Uban ni Yoyo Abayan