10 slots sa Asian 9-Ball Tour

Aron pagklaro sa isyu ug mawagtang ang mga pagduha-duha, gipatin-aw na gayod ni Matchroom Sports spokesman Luke Riches nga aduna gayoy 10 ka slots nga gitagana alang sa Asian 9-Ball Tour niining tuiga nga ipahigayon sa Abril 29-22 didto sa Jakarta, Indonesia diin may mga Pinoy cue artist na usab nga mosalmot.

Kining maong pagpatin-aw giluwatan ni Riches isip tubag sa makaylap nga balita nga makuhaan ang annual tour nga Asian 9-Ball og slots karon nga dili na ang San Miguel Beer maoy magdumala niini. Niining tuiga, ang Asian 9-Ball Tour magadala na sa bag-ong tema nga "Guinness Beer 9-Ball Tour."

"To confirm, Matchroom Sports is retaining the ten slots to the WPC in the Guinness Asian Tour," nagkanayon si Riches. "Matchroom still considers the Asian Tour as a highly competitive tournament worthy of ten WPC slots."

* * *

Alang sa kasayoran sa tanan, ang Guinness 9-Ball Tour mao ray bugtong ranking tour sa Asya alang sa mga magdudula nga buot makaapil sa 128-man main draw sa World Pool Championship nga ipahigayon sa Manila sa Nobiyembre 2007. Giklaro sa Matchroom Sports nga dili nila kunhoran ang WPC slots sa Asian Tour.

Ang nag-organisar sa Asian Tour mao ang ESPN Star Sports diin ang Guinness Beer mao nay title sponsor hulip sa San Miguel Beer. Ang Guinness Beer usa ka Irish stout beer company nga mao nay mibanos pag-sponsor sa Asian tour sugod ning tuiga. Karong tuiga, mas dagku nga premyo ang gitagana sa unom ka leg sa torneyo nga may total pot money nga US$320,000 (P16 million), doble sa total prize money sa Asian 9-Ball Tour sa miaging tuig.

* * *

Ang nahisgutang tour aduna usay grand final sa Bali, Indonesia alang sa top 10 players. Ang makadaog sa matag leg makadawat sa premyo nga US$15,000 o P750,000 sa salaping Pilipinhon, samtang ang grand final champion makadawat og US$36,000 o P1.8 million salaping Pilipinhon.

Ang opening leg ipahigayon sa Jakarta, Indonesia nga pagasundan sa Kaohsiung, Taiwan leg sa Mayo; Kuala Lumpur, Malaysia leg sa Hunyo; Singapore leg sa Hulyo ug Shanghai leg sa Agosto unya mosunod na ang Ball Grand finale.

* * *

(Mga sugyot ug pakisayod? Text sa 0910-8105522)