MVPs magsangka ugma sa Cebu Coliseum

Sa walay pagduha-duha, ang gubat sa nagpadayong Finals sa ML Kwarta Padala Mindanao Visayas Basketball Association (MVBA) Second Conference gubat sab tali sa bag-ong napiling Most Valuable Players sa ilang tagsa-tagsa ka dibisyon -- Gilbert Demape sa Mindanao Division's Holcim Pryce Pharma-MisOr ug Stephen Padilla sa Visayas Division's M. Lhuillier Kwarta Padala-Cebu City.

Ang ikaduhang gubat mahitabo ugma sa alas-6:00 sa gabii diha sa Cebu Coliseum.

Sa pagsulat niini, ang Game-1 giduwa pa didto sa Xavier University Gym in Cagayan de Oro City.

Si Padilla, produkto sa University of the Visayas (UV) Green Lancers, naila nga mangigoay og three point ug siya usab ang leading scorer nga adunay 15.5 puntos matag duwa.

Kahinumduman sa ilang unang panagbagat niadtong Disyembre 7, si Padilla nipupo og conference-best output 25 puntos.

Samtang si Demape maoy migiya sa team ni MVBA Chairman Gov. Oscar S. Moreno nga adunay 15.2 ppg. niadtong mga adlaw sa varsity pa kini ubos sa Cebu Institute of Technology (CIT) Wildcats.

Sila si Demape ug Padilla pulos nakaduwa sa nabungkag nga Metropolitan Basketball Association (MBA) diin si Demape nigilak sa Manila Metrostars niadtong 1999-2000. Sa iyang pagsidlak sa MBA napunta kini sa PBA ubos sa Talk N' Text, Purefoods Chunkee Giants ug sa Santa Lucia Realty.

Samtang si Padilla, nailado dihang niduwa kini sa sikat-kanhi nga Cebu Gems niadtong 1998-2002 sa wala pa kini mipirma'g kasabotan tali sa Alaska Aces niadtong 2003.