Bisitang fu Greyhounds gilubong sa SWU Cobras

Gilubong sa walay kukaluoy nga Southwestern University (SWU) Cobras ang bisitang Foundation University (FU) Greyhounds sa iskor nga 75-52 aron pagbinugtong sa liderato sa 1st Visayas Amateur Athletic Association (VAAA) men's basketball sa miaging adlaw diha sa Aznar Coliseum.

Ang bisitang Greyhounds sa Dumaguete City milabaw ug maoy nakabentaha paghuman sa first half sa iskor nga 34-33.

Pagsugod sa ikatulong kuwarter, ang Cobras hinay-hinay nga mikamang ug nipabuto kini og 23-7 run aron pag-inat sa ilang labaw, 56-41 paghuman sa third quarter.

Ang bangis nga Cobras ni coach Alejandrito Miego miburot sa ilang labaw ngadto na sa 23 puntos ngadto na sa pagkulit og daog.

Sa maong kadaugan, ang SWU Cobras temporaryo karong nag-una sa 10 ka teams nga nisalmot ning maong liga nga gipaluyohan sa M. Lhuillier Kwarta Padala, Nature's Spring ug Cokaliong Shipping Lines. Ang SWU Cobras nitukob og 3-0 win-loss record.

Mga iskor:

SWU (75) - Litoria 16, Gallarde 14, Belande 13, Yap 10, Ginoo 5, Escober 5, Jalandoni 4, Maguate 4, Trajico 3, Canonigo 1

FU (52) - Lumayag 14, Gio 10, Rubio 10, Amores 8, Kinilitan 7, Vincoy 3