Siso enter sa semis

Ang Cebuana nga si Sally Mae Siso yano kaayong nakasulod sa semifnal round sa girls 12-under division sa Selangor International Junior Open Tennis Championships didto sa Selangor, Malaysia.

Si Siso, kinsa gigastohan sa Osaka Iridology, Dunlop ug sa University of San Carlos, yano kaayong miangkon sa maong kadaugan dihang iyang gisirohan ang pambato sa Kuala Lumpur nga si Mohd Yasip Hyda Yazmin sa iskor nga 6-0. 6-0 nga maoy nakapahayag sa iyang tinguha pagsakmit og bulawang medalya.

Sunod nga harungon ni Siso mao ang second-ranked nga si Azhar Adebah sa Negeri Sembelan nga mag-ilog sa luna alang sa championship round.

Gawas sa singles, si Sally Mae moduwa sab sa doubles event uban nilang Shareena Kau Gill sa Kuala Lumpur.

Gawas ni Siso, laing Sugbuanon nga si Vince Mark Tabotabo miapil sab sa maong kompetisyon. Ang iyang trip giabaga ni Cebu Vice Governor Greg Sanchez.

Human sa Selangor event, ang mga Sugbuanon ug ubang RP bets ang manulong sa Penang, Perlis ug Langkawi alang sa laing kompetisyon.