DTCC mikabkab tulo ka bulawan

Ang Dancesport-Team Cebu City (DTCC) mikabkab og tulo ka gold , lima ka silver ug duha ka bronze medals sa gipahigayong International DanceSport Federation (ISDF) Philippine Open sa miaging gabii didto sa Philsports Arena sa Pasig City.

Si Cebu City Sports Commission dancesport directress Eleanor Hayco ug iyang bag-ong dance partner nga si Tom Ingan, maoy nangulo sa DTCC human mihakot og usa ka bulawan ug usa usab ka silver.

Silang Hayco ug Ingan maoy midominar sa senior A latin competition. Sila si Maricris Hermosa ug kanhi dance partner Manuel Caalim maoy nakakuha sa silver medal.

Nakakabkab sab silang Hayco ug Ingan og usa ka silver sa latin mixed age class.

Wala usab magpabitin sila si Bernie Tumarong ug Miljane Camacho nga maayong pagkaparis aron paglangkat og bulawang medalya sa modern standard grade C class.

Si 23rd SEA Games silver medalist Dearlie Gerodias ug Errol Melecio, igo lang misakmit og usa ka silver sa latin grade A.

Samtang silang Jumil Bacalso ug Virgianie Oyao nakahipos sab og duha ka silvers gikan sa latin ug modern standard youth-A division.

Sila si Eo Lowen Rendon ug Desiree Seraga miani og bronze sa youth A modern standard.

Miselyado sa kampanya sa DTCC mao sila si Joel ug Ana Madera pinaagi sa pagkabkab og bronze sa premiere grade A modern standard.