Kampo ni Gorres 'hangyo'g 'purse bidding' sa WBO

Ang kampo ni WBO No. 1 super flyweight contender Z 'The Dream' Gorres nga gipangulohan ni international promoter Sammy Gello-ani mihangyo sa WBO nga mopasiugda og 'purse bidding' aron mahigpit na ang title fight nilang Gorres ug defending champion Fernando Montiel sa labing sayo nga panahon.

Mao kini ang lakang ni Gello-ani human masayod nga gisalikway ni Montiel ang tanyag sa Golden Boy Promotions nga modepensa ang Meksikano sa iyang titulo batok ni Gorres.

Atol sa tinuig nilang convention dili pa lamang dugay, ang WBO ubos sa liderato ni Francisco 'Paco' Valcarcel mimando ni Montiel nga manalipod sa iyang korona batok sa mandatory challenger nga si Gorres.

Ang Golden Boy Promotions ni boxing legend Oscar de la Hoya, isip promoter nilang Montiel ug Gorres, mitakda dayon sa title fight sa duha karong Disyembre 9 didto sa Desert Diamond Casino sa Tucson, Arizona.

Si Gello-ani kinsa nasayod pinaagi ni GBP vice president ug international matchmaker Eric Gomez nga ang kampo ni Montiel mibalibad sa tanyag sa GBP, hinungdan nga naaghat siya pagpadala og pormal nga suwat ni Valcarcel aron awhagon kini nga ang WBO modeklarar og purse bidding.

Si Gello-ani mikomisyon sa tinahod nga international matchmaker Sampson Lewkowicz nga maoy opisyal nga representante sa Team Gorres atol sa bidding.

Kon ugaling sila maoy makaangkon sa katungod nga mo-promote sa title fight nilang Montiel ug Gorres, gusto ni Gello-ani nga anhi sa Pilipinas ipahigayon ang away unya sa Enero sunod tuig.

Kun ugaling si Montiel makahukom nga bakantihan ang iyang trono, si Gorres lagmit nga makigsangka ni No. 2 contender Pramuansak Phosuwan sa Thailand alang sa world title.