Tribu Sugbu batok Aquastars sa Boljoon

Ang Arthro Kontra Arthritis/Skygo-backed Tribu Sugbu nilang Jerry Guardo ug ni Lito 'Sirlitz' Gillamac, Jr. makigharong sa Talisay City Aquastars sa Mindanao Visayas Basketball Association (MBVA) alang sa exhibition match karong gabii didto sa Boljoon, Cebu.

Si coach Al Solis sa Tribu Sugbu magsandig sa iyang mga beteranong magduduwa sama nilang Joel Co, Tioy Almacin, Marvin Mercado ug Ronaldo Bucao.

Ila usab ikauban ang CESAFI MVP sa miaging tuig nga si Mark Ababon ug nilang Jerome Gadian, Nyok de Guzman ug Randy Sevilla.

Sa ilang bahin, ang Aquastars ni coach Eddie Ybañez, maglaum sab sa abilidad sa ilang ex-pros Bruce Dacia ug Leo Bat-og uban nilang Morsie Akad, Kim Calo,Von Harry Lanete, Eduardo Arda, Jaysar Esperat, Jessie Lumantas, Chris Carretas, Loedi Garcia, Jared Kane Abatayo ug Arnel Lozano.

Sa NBC, ang Tribu Sugbu mo- host og laing tulo ka duwa. Una nilang sangkaon mao ang Bacchus-San Juan karong Nobiyembre 10, sunod nilang harungon ang Pagadian Explorers sa Nobiyembre 11 ug dayon ang Montaña Davao sa Nobiyembre 18. Ang binyu sa mga duwa ipahibalo sa mosunod nga mga adlaw.

Sa laing bahin, ang Montaña Pawnshop nidaog pinaagi sa overtime batok sa Osmeña-Cebu, 86-80 sa nagpadayong 2006 Spring Cooking Oil-NBC National Cup sa miaging adlaw didto sa Almendras Gym, Davao City.

Sila si Randy Panerio ug Ronald Lamocha maoy nangulo sa kadaugan sa Montaña nga miposte sa ilang ikaduhang sunod- sunod nga daog sa maong torneyo nga gisuportahan sa Sulpicio Lines, Spring Cooking Oil, Molten, Nature's Spring, Holiday Plaza Hotel-Cebu ug Prime Channel.