6 ka Sugbuanong softball players apil sa RP team

Pipila na usab ka Sugbuanong softball players ang gitahasan og laing importanteng duwa, ang 8th Asian Men's Softball Championship nga gitakda karong Nobiyembre 2-5 didto sa Kita-Kyushu, Japan.

Adunay unom ka players dinhi sa Sugbo, mayoriya niini gikan sa powerhouse Southwestern University (SWU) ang gilakip nga mahimong kabahin sa nasudnong koponan nga mobanat didto sa Japan.

Mga Sugbuanon nga kabahin sa Jean Henry Lhuillier-led RP delegation mao sila si Dario Bacarisas, Ben Maravilles, Oscar Bradshaw, Jasper Cabrera, Florante Acuna ug Rogelio Rojas Jr.

Ang ubang sakop sa RP squad mao sila si Mark Rae Ramirez sa Zamboanga, managsuong Manuel ug Orlando Binarao, Apol Rosales sa Batangas, Fidel Moncera ug Isidro Abello sa Bacolod, Ulysses Mejia, Roneleon Pagkaliwagan, Romeo Bumagat, Melvin Villegas ug Rizel Santos sa Manila.

Laing Sugbuanon, nga si Isaac Bacarisas nalakip usab sa line-up isip sa usa mga assistant coaches ni Alejandro Estipular alang sa Asian Championships.

Ang RP squad gilauman nga makadala og dungog human sa ilang kalampusan pagdaog og bulawan sa 23rd Southeast Asian Games softball competition didto sa Manila sa miaging tuig.